الشاعر / متعب سعد المسيعيد
عقارب الساعة تباطت عن السير
واليوم بحسابي موازينه شهور
اضيق لا شفت الجناحين والطير
محلقة فوق السما هجرة عبور
الشوق بأوكار الصدر وده يطير
طول المسافة تحبسه غير مسرور
انا بشرق الارض باقصاها الاخير
وأهلي شمال المملكة راعة السور
ومريت أشوف مغادرين ومسايير
عند المطار ونحتري فتحة النور
وعديت من بين الكراسي طوابير
والجو يملا فرحته در منثور
يا كبتن الطيارة اعجل على خير
لا تعطي النفاثة انكاف و حسور
الدرب ما يمشيه غير المعابير
قاطع على رايه ولا يسمع الشور
وحسابنا مدفوع ماهو مخاسير
نقداً وكاش مسددينه على الفور
نبي نشوف ديار اهلنا ولا غير
وجروف سيل= شق بالارض مكسور
ديارنا يوم السواني على البير
طيب ثراها كل يومين ممطور
وشوف المطر والناس يمه مسابير
ياصل خبر و شوي تلقاه منشور
والناس للطلعات تاخذ مشاوير
وتبني الشعر في منزل= كان ماثور
هذا على وجاره دلال= مباهير
والنجر من تاريخ الاجداد مشهور
و هذا يمد الزل مجلس مناعير
ويزين المركى لرجال مخبور
و مجالسٍ دارت بالاحكام تقدير
مدهال للعسرات و الفعل مقدور
لذة تمد لها ومن دون تفكير
وتذوق نكهتها لك سنين و دهور
وناسٍ مولعها القنص بالتدابير
وقت القنص يعطونه حساب موفور
مجهامهم بالصبح قبل العصافير
ومع طلعة الصفراء على الصيدة يدور
فضلٍ من الله والتوافيق تيسير
مشببين ومعهم الحظ مكثور
نوبٍ يهدون الحرار السواطير
يا ما غرز مخلابها جوف و نحور
واللي رموه طيار واللي تقادير
ومن طيباته خلوا الصيد مزبور
اليا بغوا يشوون جتك الشناكير
ووقت الغدا المضغوط تلقونه يفور
والخبرة اللي تعطي الطبخ تغيير
تخلي الملحة لها طعم مشكور
سجة تزين لها جميع التفاكير
من عقبها الخطّر مباهيج و سرور
وهذي مثايل نظم فن وتعابير
تسلسلت لي والهوى كله شعور
والخاتمة مني صلاة و تذاكير
على نبيٍ عند الاذان مذكور