رابطة شعراء ومنشدي قبيلة الجميل
محاورة بين الشاعرين فواز البريك وسعيد المحطب
فواز البريك
سلام واللي يحبك القاف يفطن له
واللي يجيب القوافي لايسريها
يالمحطبي يوم ناديتك من الشله
لاتقلب الطاوله من فوق راعيها
سعيد المحطب
يامرحبا تسبق الفنجال والدلة
واللي يسري القوافي لا يضويها
يابن غنيم المسمى حي هالطلة
الطاولة ماعرفنا وش باوانيها
فواز البريك
الطاوله مابها غير الشحم لله
لاتقضب السالفه من عند رجليها
قل لاشقر الريش كانه مابرد غله
لاهد لايشبع الا من حباريها
سعيد المحطب
اليوم حتى الشحم يجلب لك العلة
والسالفة رجلها غطت على يديها
والحر الاشقر ماصابه بالزمن خله
برق الحباري من العصر متعشيها
فواز البريك
كان المرض مايجيب الطب طب له
الله يستر علينا من تواليها
وش فيك حطيتها ضحكه وتعلله
ياللي تجر المعاني مع علابيها
سعيد المحطب
انت الممرض ودكتور المرض قله
يفحص على الناس والمرضى يداويها
ياللي تبي السالفة بالضحك والفلة
لا ترقع السالفة ماعاد يمديها
فواز البريك
لاصرت تعرف طريق الحرف وتدله
لاتاخذ القافله منا وتغديها
وان رحت بحمولها رجع لي السله
بالتاليه مانبي نبلش بشاريها
سعيد المحطب
اي والله اعرف طريق الحرف وسجله
والقافله قافلة وابطيت قافيها
دافع فواتيرها يامعزب الحلة
لا تاخذ فلوسها وتقول عطنيها