الشاعر الكبير : فهيد الباطح الجميلي رحمه الله
شقاك البين يا رجمٍ شقاني يعجب اللعاب
زهالي راس مرقابه يكف القاع بالزّومه
عمرّد عاليٍ راسه لطرّاد الولع جذّاب
طرى شيّن على بالي هذا به حل مقسومه
ألا يا رجم علمني وش المانع على الاسباب
ولا نفسي على الضيقات بالمرقاب ملحومه
ألا يا تل قلبي تل غرباً تلها الجذّاب
ركب محالةٍ صرّت عليها الثقل مضيومه
تزوح الجمّه الخرسا غروبٍ تبهج الشرّاب
تراطن ريهجان الماء بشوحاتٍ كسر حومه
ألا يا شيب عيني من بعيدٍ جابها الجيّاب
شدهني منه واسجني عسى يومي قبل يومه
انهوني عنه يا ربعي حرجني حرجت الجلّاب
يعد النقص بالزّايد عليّه من ورى السّومه
خذاني ما يعرف المنع كذّابٍ ضنا كذّاب
واشوف الحكي من قومي عليّه عاونت قومه
خبيثٍ ما يخاف الله ولا كنّه وراه حساب
يبيع الدين بالدنيا يغر الناس بسلومه
ألا يا عين قرناسٍ قضيب وراعها القضّاب
فجعها وحشتٍ واخلف طواريها عن الهومه
وألا يا عين جمّ الصيد هب لها هوى الخنياب
تقود الجل والقرّح تبعها جملت الشومه
شقاني من يعزّيني تنحّوبه واهله اجناب
هني من شاهد الغالي عن الوجلا على النومه
بلج عن مثل قرطاسٍ تلاعج منوة الكتّاب
زهى بالدّقه الخضرا بخط النيل مرسومه