هذه القصيدة الرائعة عن القنص والطير للشاعر الكبير/ معطاب بن مسيعيد بن حفر الجميلي
والشاعر معطاب غني عن التعريف ، وأترككم مع هذه القصيدة الإبداعية

[poem=font=",6,green,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""] يا ما حلى المقناص في بعض الأوقات=ومجهزٍ ربعك نشامى مشاكيل[/poem][poem=font=",6,green,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""]
مستطربينٍ للقنص عقب رجنات=راحوا معك ومشببين دواليل
البر له لذة وللصيد لذات=والطير فنٍ من فنون الرجاجيل
ياما حلى اللي له على الصيد عادات=اللي هداده منه عدّوا وتهاويل
أبيض وبه من دق فارس علامات=يلحق لحوق طيار خف وتناويل
ما هو بكفاخٍ ولا فيه صرخات=ولا فيه خبث أطباع من كل تشكيل
طلاع ركادٍ على الكف مدلات=مكملٍ من كل الأوصاف تكميل
يا أهل الجيوب البر يحتاج طلعات=مير أجمعوا غرضانكم والمعاميل
باقي عليه شوي من غير مبطات=عقب انصرافة حرة القيض وسهيل
على رخاكم ضبطوا كل حاجات=تكيلوا من كل ما عازكم كيل
يقبل براد الوقت والحر كد فات=على رجاء الله بالليال المقابيل
باكر ليا عينت للغيم عينات=بأول دخول الوسم غرٍ مظاليل
صك الخيال وجنّك السحب زافات=حق الحقوق وسكبن الهماليل
عقب السبوع تشوف بالقاع زخات=العشب جاك مشوبشن له زغاميل
زان الخضار وصار للجو نظرات=والقاع تستبشر ليا دجها السيل
فوق الشهر والسحب تمشي مسوقات=ما يطلع الطالع ولا له محاييل
لين أكتمل نبت السهل والعلاوات=لو تذكره ما صدقوك المهابيل
تلقى بها الغدران مثل المرايات=كل المصامد فيّضت وامتلت ميل
عشبٍ فقع والماء نقع بالقرارات=خبارين تطرق ثلاثة مهاليل
ذقنا بها دورات يوم البداوات=أيام فاتت لو بالأيام كد قيل
حنا نبيهن مير عنا مصدات=أقفا هواهن مع هل الكنّس الحيل
نذكر منازلنا مصايف وشتوات=مراحنا ومقامنا والمراحيل
مرن وراحن تقل ما فات لذات=ذكر الديار يبهذلنك بهاذيل
ارض القنص يوم القنص بالحلاوات=بين اليديه والدحل والطريبيل
تمسي وتصبح ما بها السكن قفرات=بس القبيسة تشعب القلب وتهيل
وتكوسر الحس المونس بالأصوات=لا هو طرب قلبٍ ولا هو ولاويل
طير الصفاري جاك دفعات دفعات=يبي الوسامي معطيٍ وجه ومحيل
ريح الندى جابه وريح النباتات=مع نونسناس الهواء جن عرازيل
جاكم خبر لن الحباري كثيرات=القاع فيها عينوا جول وجويل
ورحتو لهن من حسن الأوفاق صدفات=جيتوا وشفتوا للحباري جواديل
هذي مروشه بالمرابخ مربات=بالحرف تلقى له مراح ودحاميل
جيت أتتبعهن وبالقاع حروات=متشربٍ تلّع فروع الهذاليل
عندي وأبلقاهن فرادا وجمعات =وأنا بكفي من يونس ليا شيل
كد قلّب الحفان مرات مرات=بيض الزنود مغربلاته غرابيل
فرن وطارن بالخضيرات مخلات=محلقاتٍ بالهواء حيلهن حيل
أليا شافهن بالعين مامن حسا فات=ماكنهن إلا نطوحٍ مقابيل
من تل سبقه وانطلق زاع با قفات=شهق شهوقٍ فوق روس المخاييل
يوم إرتفع عدة كيالو ومترات=حول عليهن من شفى الغيم تحويل
تقلبن بساع للقاع عجلات=علق بهن الطلع يا ويلهن ويل
طاحن موتى موت لوهن حيّات=مستدخلاتٍ بالشجر والعدابيل
ما واحده منهن تبدي حركات=واللي تكوبر بينهن شالها شيل
فيل عليها يمزع الريش وشوات=الجول طاح وشاف جثل السراويل
عثابهن باللوح صفقه ودلوات=كنك تنبلهن على الكيف تنبيل
حصل الشبب واللي حصل فيه مكفات=صدنا وحصّلنا خيار المحاصيل
زان العشاء واستكملن الطلبات=معنا النهار مطرف وأقبل الليل
ثم ارتفعنا يم روس المنيفات=نبي هشيم إرطا وحمر الغراميل
القاع خضراء والشجر كنه أبيات=مشروك يابس وأخضرٍ كنه النيل
وقت المساء والنفد للقلب مشهات=شوفوا لنا قاع النزل يالنوازيل
ندافة حمراء مذاري ومدفات=غرمول ياللي تشتهون الدهاكيل
بس الهواء الطاهر مصفيه تصفات=ناقف بها ميقاف ونجدع الشيل
والنار شبت عقب ذلك بلحظات=سووا عشاهم وأشقر البن والهيل
تلقى البريق ودلته فوق مجذات=ثم أحضرو كاساتهم والفناجيل
مستانسين لهم كرارة ولعبات=قمرا زريق وصار فيها تعاليل
وناسةٍ ياويها من وناسات=تبز في عمرك على الطول والطيل
وأمنٍ وأمان بظل سيد الحكومات=بالعدل بعد الله نجاز وتفاصيل
بظل السعود مسهلين الصعوبات=أمرٍ بشرع الله وعدلٍ عن الميل
تمشي مريح البال عبر المسافات=بأوطانك اللي تشتهي والمداهيل
هذي طرات البر يأهل الطراوات=في ذا ومثله يصلحن التماثيل
طرايفٍ فنٍ وذوق ونقاوات=شعرٍ يهز أوتار قلبك من القيل
وارجي السموحه كان عندي كمالات=إن ما كفاكم فارسلولي مراسيل
وتمت وخاتمها صلات وتحيات=على النبي ما فات جيلٍ بثر جيل[/poem]