قصيدة الشاعر : سطام المنيجل بمناسبة زواج الملازم أول : مسيعيد بن سعد بن مسيعيد الحفر الجميلي
شب الفتيلة ياهجوسي وأشعل الساحة شعر
وانا أدري انّي لا نويت اقدم واجيب اجزالها
مثايلن" متفرده من ناتج ابداع الفكر
للي دعاني سقتها والخيل من خيالها
يامرحبا باقرابنا وباللي تعنى من سفر
في محفل افراح المسيعيد ارحبوا يرجالها
من خاطري ترحيب قدره ما يثمن بالدرر
على الضيوف اللي يزيد الابتهاج اقبالها
عند الرجال اللي ذكرها بالمواقف مشتهر
تقدم على شيل الحمول الكايدات احمالها
مبروك يامسيعيد جعلك للفرح طول العمر
الله يهنيك و عسى الفرحة يزيد اطلالها
ملازم اول لا عطيت امر امتثلنا لاامر
كلن يهاب اوامرك وكلمتك يسعى لها
كسبت بيمينك فعول الطيب وفعول السطر
وابوك شربك المراجل من كبار ادلالها
ذاك ابومعجب وارث اسلوم المراجل من صغر
نال الكرامة من جدوده و الشهامة نالها
وانعودت للجد ذاك اسمه مسيعيد الحفر
يقلط على اصعاب العقد ويحل كل احبالها
يالله عسى قبره مغطّا امن الرضا عشب وزهر
واعصم عيونه عن جهنم لا يشوف اهوالها
اقولها بسم ابومعجب ياهلا باللي حضر
في محفله تلقى المكارم وافيات اخصالها
من روس قومٍ ترهب معادينها وقت الخطر
اخوان سلمى لابتي تظفر بكبر افعالها
اليا ابتدا صيت الفخر حنا تعدينا الفخر
نرقى على قمة طويق و لا نهاب اجبالها
ياللي تعادينا انتبه واخذ الحذر ثم الحذر
الطيب حنا والمراجل كاسبين اطوالها
نكسر عظام المعتدي مايلقى لاعظامه جبر
ونوطى على روس العدا وانبيد كل ابطالها
عز الجميلي لا انتخيته كنه الموت الحمر
اليا حضر للمعضلة فكك جميع اقفالها
وقبل الختام اقولها مافيه قاصر بالبشر
كل القبايل وافيه والله يجمّل حاااالها
واختامها يامرحبا باهل الوفاء واهل الظفر
في محفل افراح المسيعيد ارحبوا يرجالها