الشاعر / مصلح بن فهيد الباطح الجميلي
انا باديٍ بأسم الله الخالق الرحمن .... عظيمٍ كريم وكل خلقه تلجابه
انا اعوذ بالرحمن عن همسة الشيطان .... وأنا مؤمنٍ بالله وبالرسل وكتابه
انا مصلح بن فهيد بن باطح الحمدان .... ابن صايد اللي كل ربعه تنخابه
ليا عدوا الفرسان حنا اول الفرسان .... نحوَّل عقيد القوم ونوّخ ركابه
لنا من قديم الوقت بأم الجماجم شان .... بيومٍ عبوسٍ والله اللي نصرنا به
فعل صايد اللي صارت به الجميل اخوان .... مع اخوان سعدا الماجد ومن تعزوابه
هذا صايد اللي لأهل الغطرسه سلطان .... يذل الغطارس والعدو ياخذ حسابه
له فعول ماتخطر على بال كل انسان .... يجيب الرّقيبه حي من راس مرقابه
به الشعر يقصد ويتحاكابه الديوان .... كسب مدحٍ ويستاهل المدح كسَّابه
ترى ماتقدّم قومٍ إلا من الشجعان .... يجيب الخبر وفعوله تنومس اللّآبه
حمات الدّخيل ليا نصانا عن العدوان .... نفكّه بحق وجاهنا كلٍ يهابه
دخيل الدّميني ابن صايد بن عنيزان .... رقد بالأمان ولا أحدٍ يقرب ترابه
من ديار حايل لين بغداد بالأمان .... حلف ما أحدٍ ياصل دخيله من أحرابه
حرار نتسابق للشجاعه عن النقصان .... نحب المعالي دايمٍ ونتعلابه
وحفر والسميري بالملاقا فعلهم بان .... هم اخوان صايد عوق من يفتل اشنابه
يشومون للعليا ان قسى الوقت والّا لان .... بفعلٍ ينومس والمجالس تحاكابه
نخاف الولي ونكرم الضيف والجيران .... نهزم العدو ونعطي الحق طلابه
وانا ما اتكلم في كلامٍ بلا برهان .... دليلٍ على الفعل الجميلي تسمابه
شبابٍ جهل فينا نقول انشد الشيبان .... ترى العود يذكر ذكر عوده وشيَّابه
وكلٍ على ساسه من الابن للجدان .... سلوم الجدود الماضيات انتحلابه
شيوخ الجميل بفعلهم يرجح الميزان .... حكيمين رايٍ وامرهم ينتقدابه
امير الجميل ابن منيجل وسيع بطان .... بعيد الهقاوي هقوته ماتدنابه
محيَّف على طلح البراري على من كان .... وكل العلوم الغانمات ايتبدَّابه
امير الجميل امْهدَي من خيرة الشيخان .... شجاعٍ حكيم وكلمة الحق يسعابه
عديم وكريم وبالمواقيف ذرب ايمان .... ليا جاه من يشكي عنا الوقت هلّآبه
امير الجميل غنيم له تشهد العربان .... امير الكرم وله الكرم فاتحٍ بابه
زبر بالجنيفا مفطح الحيل والخرفان .... شهد من تغدابه ومن جا تعشابه
وعودٍ يفوح وشاذليه من الرسلان .... تعدَّل عماس المنعمس لا تقهوابه
وعبدالهادي ابن غنيم من بارزه خسران .... اميرٍ شجاع وفارسٍ ينتهقوابه
مضى فعل ابو شرشاب بالخيل والركبان .... وزبَّن صويبٍ فوقه النار شبّابه
زمانٍ مضى يوم البدو تنزل الجيّان .... على وردت الماء البدو ذبحات وطلابه
عيال الجميل تورّد المي للضميان .... ومن جا يبي منه الفزع ما تردابه
شباب الجميل الصاحي الواعي الفهمان .... قويين بالله العلي وانتقوابه
عن الانحراف وعن هل الظلم والطغيان .... وعن الجور واهل البغي والكفر وارهابه
جميع القبايل تفعل الطيب والاحسان .... ومن يعمل الحسنى من الله يجزابه
وكل القبايل والنّعم مالها حقران .... وترى كل حقٍ من قبيله معيّابه
وحنا بوقتٍ نحمد الخالق المنّان .... امانٍ وامن وارزاق والخير باسبابه
بعد ظل ربّي ثم ظل الملك سلمان ..... هو العاهل اللي كلمته ما يثنابه
ولد من حكم نجدٍ على سنه وقرآن .... عسى بجنة الفردوس له بيت يبنابه
واختم المثل باسم الله القادر الديّان .... باسم الله اختمها وباسم الله ابدابه