عرض مشاركة واحدة
قديم منذ /10-06-2015   #1

 
مشرف قروب شعراء ومنشدي قبيلة الجميل
ومشرف ديوان الشاعر سعد مسيعيد بن حفر

الصورة الرمزية عافت الأميّر

 

عافت الأميّر غير متواجد حالياً

 رقم العضوية : 10235
 تاريخ التسجيل : Jun 2015
 المشاركات : 48
 النقاط : عافت الأميّر will become famous soon enough
 تقييم المستوى : 117

مزاجي
رايق
افتراضي الفيه الشاعر يوسف بن معطاب بن مسيعيد الحفر الجميلي

بسم الله الرحمن الرحيم


الفيه الشاعر / يوسف معطاب الحفر الجميلي


الفٍ اولّف من قصيدي معاني
من هاجسٍ قام يتفكّر بلاني
حاولت به منّا ومرات منّا
لا ما على بحر القصايد رماني ..

والبا بديت بخالق الانس والجان
وثمٍ ضبطت القاف من كل الاركان
لين اعتدل والبال بالحيل سمحان
تفضّلوا ياهل العقول الرزاني

والتا تشوف الناس كلٍ له طبوع
من راهي ومن قاطعٍ كبده الجوع
والبعض لامن قال له هرج مسموع
حتى العنيد يليّنه ب اللساني

والثا ثقيل العقل يعطيك تنبيه
شوفه بعيد ومبعدٍ في هقاويه
والطبع ذا تلقى زمانه مجافيه
لو ينطعن يبقى عريب المجاني

والجيم جور الوقت للقرم عادات
ولازم يعرّضه القصا والقساوات
وان ما صبر يكويه ب آحر كويات
ويا خيب يحسب ب هالوقت اماني

والحا حماة النطق عن سب الاصحاب
خل اللسان لكسب الاصحاب جذاب
بلكن تداوي جرح من قبل ماطاب
وهذي صفات اهل الشيم والمكاني

والخا خراب النفس تبع المشاهي
وتدفع ب تابعها ب درب النواهي
ويشرب ذنوبه مثل شرب المياهي
والله وعد قطاعها ف الجناني ..

والدا دليل القول بالفعل ينشاف
وقولٍ بليا فعل ينعاف ينعاف
مثل الرمي لاصار ما يضرب اهداف
ومفكّرٍ نفسه سهيل اليماني ..

والذا ذكي الفكر ما فيه منقود
متعلّيٍ بالعز والطيب والجود
ماهو ب هلّاقٍ ولا هو بمقرود
لا راح يلفي بالجزال السماني ..

والرا ركوب الخيل يحتاج خيال
وحبلٍ قوي العقد يحتاج حلّال
وحملٍ ثقيل الوزن يحتاج شيّال
وهذا كلام موضّحٍ مع بياني..

والزا زميلٍ وافي احذر تعيبه
خسارة الوافي تراها مصيبه
واحذر كلام الناس لك وش تبيبه
خلك وسيعٍ بالنظر والبطاني ..

والسين سلب الحال كثر الهمومي
وراع الهوا دايم همومه تحومي
ما ذاق له راحه ولا ذاق نومي
ويشكي هواه ومن همومه يعاني ..

والشين شورك ثمّنه لا بدا الشور
واحذر تشيل الهرج من شاهد الزور
لا تنثبر مع واحدٍ كان مثبور
وثمٍ تطيح من العلا للطّماني ..

والصاد صمتك بعض الاحيان خيره
وقل الكلام ابرك ترا من كثيره
وخزّن جزيلك وسط صدرك ذخيره
ولا جا مجالك جزّله ب المعاني ..

والضاد ضيق الصدر لاجاك محتاج
زودٍ على احراجك يزوّدك ب احراج
ثمٍ بلشت وقلت يالله الافراج
الضيق الاول خالطه ضيق ثاني ..

والطا طعون الرجل عيبٍ تطرّا
ومن بيّح ب سده يذوّق بمرّا
ولا عن طعون الوقت صد ومفرّا
والقرم سدّه يكتمه ب الكياني ..

والظا ظنون السو مدخال الاوهام
بعض الظنون تحمّلك ذنب وآثام
مير احسن ظنونك ولا تصير نمّام
ولا تستهين اعلم ترا العمر فاني ..

والعين عاون من طلبك المعونه
خل الجمايل هي نواياك دونه
لا احتجت له يعطيك حتى عيونه
يذكر جميلك يوم يلفيك عاني ..

والغا غناتك بالقناعه فضيله
ماهي بكثر المال ولا قليله
واقنع ليا من شفت بالوقت عيله
والرجل عيب يقول وقتي قساني..

والفا فروخ الحر من حر واحرار
مطلاعها صارم على كل الاطيار
وقت الهداد تنزّل الطير لا طار
لو هي ثلاث وخمس ولا ثماني ..

والقاف قولك للحقيقة ينجّيك
من حر نارٍ ب اللواهيب تشويك
والكذب يدخلك بوسطها برجليك
واصدق بقولك قبل فوت الاواني ..

والكاف كنت اقول ماني بقاصد
لا من بغيت انساه كيف يتزايد
وايّست من تركه وقلت القصايد
لا من بغيت انساه سيّر وجاني ..

واللام لو كل من زعل راح مقفي
ماكان شفت الناس للناس تلفي
ولا شفت لك خلّان للبعض توفي
والعذر للمخطين حقٍ وشاني ..

والميم ميّزت ووصفت المخاليق
من ماطرا لي قمت اجيب الطواريق
وبيّنتها مثل السراوات وطويق
وثمٍ قراها كل قاصي وداني ..

والنون نور الوجه كلّه مع الدين
خصٍ ليا من صرت بين المصلّين
آخير من ناسٍ عن الدين لاهين
واخير من خوّة قليل الحساني ..

والها همومٍ بالحشا مستكنّه
وسود الليالي بالسهر عذّبنّه
لو عنه راحن باكر الصبح جنّه
ويتلتلن القلب تل السواني ..

واللا لذيذ النوم كثره بلاوي
مايهتني به ذيب سرحان عاوي
للكلب والهلباج كثره هناوي
ولا يهتني به غير رجلٍ جباني ..

والواو وصل الرحم حقٍ وواجب
وليا قطعته ف اعلم انك معاقب
ينفعك وقت حضور يوم المحاسب
واحذر تقول القدر زل وعصاني .

واليا يمينك لا تحوش الهزايل
واتعب يمينك بالفعول الجزايل
سو الجميل ولا تحرّا الجمايل
يبقى جميلك لوك تحت الدفاني ..

وصلاة ربي عد رمل النفودي
واعداد نوّار الزهر والورودي
واعداد ما ينبت على القاع عودي
على النبي المصطفى الافضلاني

.







توقيع »
  رد مع اقتباس