قصيدة الشاعر الكبير / فهيد الباطح الجميلي رحمه الله
بالشيخ / سلطان بن نايف بن حميد العتيبي
قال منهو للدهر جرّب وشايف .... ذايقٍ مرّ الليالي مع حلاها
صارت الضنّات والهقوه خفايف .... والضريبه بيّنت للي رماها
استوى المسيار وابيوتٍ طرايف .... للشيوخ اللي رفيعٍ مستواها
نبي مسيارٍ لسلطان بن نايف .... وألحق النفس الشفيقه من هواها
ابن شيخٍ تفهمه سبع الطوايف .... يذري اللي جاذيٍ عنها ذراها
نايف اللي به تذرّى كل خايف .... قبل ابوه وجدّه العليا رقاها
كاملينٍ بالفعول وبالوصايف .... ومن يخبر فعول اهلكم ما نساها
يوم حزّات المغازي والنكايف .... والسبور لها الجنب تطحن رحاها
يا اخو نوضا انته عقيدٍ ما انت حايف .... عارفين شيوخ نجدٍ واومراها
من حرارٍ كان هدّت ما تضايف .... الطيور القاصره يرمي عشاها
مقدم عتيبه مروّية الرهايف .... فعلها بايمانها حامٍ قفاها
يوم شفتك ما على نفسي حسايف .... عل تذخرك الليالي في بقاها