قصيدة الشاعر / باطح بن فهيد الباطح الجميلي
يا عيد وين اللي من أول بغينـاه
اللــي جـرح قلبـي ومكّـن صوابـه
راعي جديلٍ فوق الامتان يزهاه
يـضفـي علـى ردوفٍ يشيـلن ثيابـه
مـن اولٍ لــو هــو بعيــدٍ نصيناه
مـن شانهم درب الخطـر مـا نهابـه
كـم ليلةٍ في لذّ نومه هجدناه
فـي ساعةٍ يا عيـد مـا احـدٍ درابه
واخذت انا لي مزّتٍ من شفاياه
مــن مبسـمٍ يا عيـد عـذبٍ شرابه
ليا هرجلي وابتسم فـي ثنايـاه
عليه صنـــدوق الحشا جاب مابه
خلي فدالي كل حيه وانا افداه
روحي وما تملك يدي و القـرابـه
واللي زعل من شانهم ما ترضاه
من شـان خلـي ما حسبـنا حسـابه
يا زين هاك الوقت يا عيد زيناه
مــع الـولـيـف اللـي غظـيـظٍ شبابه
واليوم تسع سنين ما عاد شفناه
مدري وش اللي صار له في غيابه
يا عيد ود العلم يمّه وعطنـــاه
ودّ الســلام وخـبّـره بـالإجـابه
إن كان خلي عافنا ما غصبناه
وإن كان هـو مقبـل علينـا هلابـه
قلّه طريق الحب عقبه تركناه
جنّبــت طاروقــه وصكّيـت بابـه
اخاف من بلوى تجي مثل بلواه
وابلــش بتاليهـا وتصيــر الطـلابه