الشاعر : مخلد الغنيم
1422 هـ
اعذر العين راح الليل من دون نوم
لا ذبحني غرام ولا مفارق حبيب
ضيقة الصدر صارت سيرتي كل يوم
ادمنتني وانا مستغربٍ لو تغيب
وانت يا ملحقٍ قلبي عتابٍ ولوم
شتعرف عن حياتي وانت عنها غريب
بين جيش الزمان وبين بحر الهموم
ان تقدمت حسرة وان تراجعت عيب
لي طموحات بس الحظ عيا يقوم
اجتهدت بحياتي مير مامن نصيب
ما قبلت الخضوع ولا ذخرت العزوم
ولاستعنت بصديق ولافزع لي قريب
كل مايكبر المطلوب عند اللزوم
قل فيه العوين وقل فيه المجيب
يلفح البال حزني مثل لفح السموم
ما تذريت وانا اعيش بعزوم ذيب
شاعرٍ وتْـحكمني مفردات السلوم
منهجٍ في حياتي عنه عزلي صعيب
شاعر واختصرت مواصفات القروم
واثقل الحمل يومي صرت شاعر واديب
ماتلبست في عمري لباس الرخوم
لا ولاارضاه لو يصبح لباس الصحيب
وانت يامن ترقّب في مكان النجوم
نطّح الجدي كانك بالسما مستريب
لا تساوي قشور القوم مع راس قوم
ماهضم ذمة الاجواد رجلٍ لبيب
والخطا طبع لابن ادم ولاانت معصوم
واعتذار البنادم يعتبر زود طيب