عرض مشاركة واحدة
قديم منذ /01-11-2015   #1

 
مشرف قروب شعراء ومنشدي قبيلة الجميل
مؤسس القروب بالواتس

الصورة الرمزية بشير فهد

 

بشير فهد غير متواجد حالياً

 رقم العضوية : 10236
 تاريخ التسجيل : Jun 2015
 المشاركات : 418
 النقاط : بشير فهد will become famous soon enough
 تقييم المستوى : 154

مزاجي
رايق
افتراضي الشاعر الكبير : معطاب مسيعيد الجميلي ~ يا ما حلا المقناص في بعض الاوقات

الشاعر الكبير : معطاب مسيعيد الجميلي



يا ما حلا المقناص في بعض الأوقات
مجهّزٍ ربعك نشاما مشاكيل

مستطربين ٍ للقنص عقب رجنات
راحوا معك ومشببين ٍ دواليل

البر له لذه وللصيد لذات
والطير فن ٍ من فنون الرجاجيل

يا ما حلا اللي له على الصيد عادات
اللي هداده منه عدّ و تهاويل

أبيض وبه من دق فارس علامات
يلحق لحوق طيار خف وتناويل

ماهو بكفاخ ولا فيه صرخات
ولا فيه خبث طبوع من كل تشكيل

طلاّع ركّاد على الكف مدلات
مكمل من كل الأوصاف تكميل

يأهل الجيوب البر يحتاج طلعات
مير أجمعوا غرضانكم و المعاميل

باقٍ عليه شوي من غير مبطات
عقب انصرافة حرت القيض وسهيل

على رخاكم ضبطوا كل حاجات
تكيـّلوا من كل ما عازكم كيل

يقبل براد الوقت والحر قد فات
على رجاء الله يالليال المقابيل

باكر ليا عيـّنت للغيم عينات
بأول دخول الوسم غر مضاليل

صك الخيال وجنـك السحب زافات
حق الحقوق و سكبن الهماليل

عقب السبوع تشوف بالقاع زخـّات
العشب جاك مشوبشٍ له زغاميل

زان الخضار وصار للجو نظرات
وسم ٍ على وسم ٍ وسيل ٍ على سيل

فوق الشهر والسحب يمشن سوقات
ما يمشي الماشي ولا له محاييل

لين اكتمل نبت السهل والعلاوات
لو تذكره ما صدقوك المهابيل

تلقى به الغدران مثل المرايات
كل المصامد فيضت وإمتلت ميل

عشبٍ فقع والماء نقع بالقرارات
خباري تطرق ثلاثة مهاليل

ذقنا بها دوراق يوم البداوات
أيام فاتت لو بالايام تبديل

حنا نبيهن مير عنا مصدات
أقفى هواهن مع هل الكنـّس الحيل

نذكر منازلنا مصايف و شتوات
مراحنا و مقامنا و المراحيل

مرن وراحن تقل ما فات لذات
ذكر الديار يبهذلنك بهاذيل

أرض القنص يوم القنص بالحلاوات
بين اليديـّه والدّحل والطريبيل

تمشي وتصبح ما بها السكن قفرات
بس القبيسه تشعف القلب وتهيل

تكوسر الحس المونـّس بالاصوات
لا هو طرب قلب ٍ ولا هي ولاويل

طير الصفاري جاك دفعات دفعـات
يبي الوسامي معطيٍ وجه ومحيل

ريح الندى جابه وريح النباتات
مع نود نسناس الهوى جن عرازيل

جاكم خبر لن الحباري كثيرات
القاع فيها عيـّـنوا جول و جويل

رحتوا لهن من حسن الاوفاق صدفات
جيتوا و شفتوا للحباري جواديل

هذي مروشه بالمرابخ مربات
بالحرف تلقى له مراح ودحاميل

جيت أتتبعهن وبالقاع حروات
متشرّبٍ تلع فروع الهذاليل

محري وابلقاهن فرادى وجمعات
وانا بكفي من يونـّس ليا شيل

قد قلـّب الحفـّان مرات مـرات
بيض الزنود مغربلاته غرابيل

فرّن وطارن بالخضيراء مخلات
محلقات بالهوى حيلهن حيل

ليا شافهن بالعين مامن حسافات
ما كنهن إلا نطوح مقابيل

من تل سبقه وا نطلق زاع بقفات
شهق شهوق فوق روس المخاييل

يوم أرتفع عدة كيالوا ومترات
حوّل عليهن من شفى الغيم تحويل

تقلبن بساع للقاع عجلات
علق بهن الطلع ياويلهن ويلّ

طاحن موتى موت لوهن حيـّات
متدخلات بالشجر والعدابيل

ما وحده منهن تبدي حركات
واللي تكوبر بينهن شالها شيل

فيّل عليها يمزع الريش وشوات
الجول طاح وشاف جثل السراويل

عثى بهن باللوح دلوه وصفقات
كنك تنبلهن على الكيف تنبيل

حصل الشبب واللي حصل فيه مكفات
صدنا وحصلنا خيار المحاصيل

زان العشاء وستكملن الطلابات
معنا النهار مطرف وأقبل الليل

ثم ارتفعنا يم روس المنيفات
نبي هشيم أرطى وحمر الغراميل

القاع خضراء والشجر كنه أبيات
مشروك يابس وأخضر ٍ كنه النيل

وقت المسى والنفد للقلب مشهات
شوفوا لنا قاع النزل يانوازيل

ندّافه حمراء ومذرى ومرفات
غرمول ياللي تشتهون الدهاكيل

بس الهوى الطاهر مصفيه تصفات
ناقف بها ميقاف ونجدع الشيل

والنار شبت عقب ذلك بلحظات
سووا عشاهم و اشقر البن والهيل

تلقى البريق ودلته فوق مجذات
ثم احضروا كاساتهم والفناجيل

مستانسين لهم كراره ولعبات
قمراء زريق وصار فيها تعاليل

وناسه يا ويّها من وناسات
تبزّ في عمرك على الطول و الطيل

وأمن و امان بظل سيد الحكومات
بالعدل بعد الله موجز وتفصيل

ظل السعود مسهـّلين الصعوبات
أمرِِِن بشرع الله وعدل ٍ عن الميل

تمشي مريح البال عبر المسافات
بوطانك اللي تشتهي و المداهيل

هذي طرات البر ياهل الطراوات
في ذا ومثله يصلحن التماثيل

طرايف ٍ فن ٍ وذوق ونقاوات
شعر ٍ يهز أوتار قلبك من القيل

وأرجي السموحه كان عندي كمالات
ان ما كفاكم فرسلوا لي مراسيل

تمت وخاتمها صلاة وتحيـّات
على النبي ما فات جيل بثر جيـل







توقيع »
  رد مع اقتباس