الله يبيحك يا ابيض الوجه يا فهيد
فهيد ابو باطح عسى الله يجيره
عساه. في. قبره. بضلٍ. و تبريد
وروايحه مسكٍ تشمشم عبيره
اقولها واطلب من الله وازيد
الله يفكك من لهايب سعيره
فهيد أعرفه عرف قرم الاواليد
قاوي على نفسه بعرف وبصيره
راحو ثلاثة من عربنا صناديد
ومن عقبهم شفت الخلل بالعشيره
فهيد وقطيفان من دون تحديد
والوالد مسيعيد مكرم قصيره
زعيم ربعه يوم بالوقت تعقيد
نطاح قالاتٍ ثقالٍ عسيره
ربعه وهو منهم سلايل و اجاويد
اذكارهم تبقى سنينٍ كثيره
اقولها من قلب مدحٍ وتمجيد
واطلب لهم رحمه من الله بريره
حيث ان ما فيهم للاصحاب تنكيد
الكل منهم فيه خيرٍ وخيره
مرثيةٍ فيهم ولابه مناقيد
ومن عقبهم ربعي لي اطيب ذخيره
..................
الشاعر / سعد مسيعيد الحفر الجميلي