الشاعر / باطح بن فهيد الباطح الجميلي
يقول من غنّى بطاروق الابيات
امثال منها المجتمع يستفيدون
يختار من ندر المعاني الجزيلات
يجيب طاروقٍ مرتّب ومازون
شاعر ولد شاعر شبوحه بعيدات
ماهو على ما قيل من دون في دون
نبي نعبّر عن امورٍ كثيرات
واوضّح المعنى على كل مكنون
صل الفروض الخمس في كل الاوقات
وصم رمضان وزّك واحذر تناسون
وحجك لبيت الله يمحي الخطيات
اليا اقبله منّك ولا صار تقوون
والوالدين لهم حقوقٍ كبيرات
اخفض لهم بالرفق لحين يرضون
وجارك وضيفك له حقوقٍ قديمات
سلم العرب يمشي على كل قانون
وصى عليه المصطفى بالرسالات
لـ اقوام راحت معه واقوام ياتون
وصح المثل قال التجارب مفيدات
تعطيك درسٍ عنه ما كان تدرون
لك يالفتى شرهه وعليك شرهات
وليا حشمت احشمت ذا شي مضمون
لا صار لك مع الرجاجيل وقفات
بالطيب لا جا لازمك ما يصدون
عليك في خوة رجال المهمات
اهل الكرم عند المواقيف يافون
واحذر جليس السوء واهل النميمات
خل النمايم هي واهلها يولون
و لا تطيع هرج مفرقّين الجماعات
اهل الحسد و الحقد مهما يقولون
و لا تواخذ الجهال في كل زلات
ادمح خطاهم لين باكر يعقلون
ترى الجهل مثل البحور المطمات
ياعزتي للي بوسطه يغوصون
هذي نصيحه يالوجيه السفيرات
والعمر لو هو طال تاليه مدفون
تمّت بذكر اللي يعلم الخفيات
الواحد المعبود هو خالق الكون