هذه القصيدة للشاعر الكبير / دلول بن مطيلق الطراح الجميلي - رحمه الله -

وقد بحثت عن القصيدة وحصلت على هذه الأبيات وتم تدوينها في الموقع الرسمي للقبيلة

ومن لديه إضافة فليكرمنا بها مشكورا مأجورا


أمس الضحى نطيت أنا راس نابي
في راس عيطا مرتفع خشمها به

جلست به من طلعة الشمس شابي
لحين هفن الذواري وأنا به

رجم ليا ناظرت ما هو بكابي
رجم على روس المفالي طنابه

وش مقعدي في عاليات النوابي
لصار ما لي في حجا الرجم ثابه

ياراكب من فوق حر هذابي
اللي ليا دنوه يمهر ضرابه

يا الله ياللي لك تحج الركابي
خلاق رزق ابن آدم ما احتسابه

تجيب من هو صار سبة عذابي
طلبه عساها عند ربي مثابه

ما أنساه كود الحضر تنسى الكتابي
وإلا الغنم تنسى عطيب الذيابة

ياصاحبي عنزٍ ربت بالخبابي
عود على الأمياه يذري الهوابه

البارحة عندي قريب القرابي
واليوم مدري وين ربي دوابه

البارحة بالطيف جاني منابي
قرب عشيري من دياره وجابه

يا خانتك يالحلم مثل السرابي
ماذكر عطشانٍ شرب وارتوابه

أنا سعيت بواحد ما سعى بي
وعطيت قلبي واحد ما درابه

طرد المقفي مابه إلا العذابي
تتلف ولاعند العرب لك مهابه

وافرح بليلات مضن من حسابي
ولا أحسب إن الموت يقفانيا به