قصيدة الشاعر الكبير : فهيد الباطح الجميلي رحمه الله التي أهداها للشاعر الكبير : خلف المسيعيد الجميلي
نطّيت رجمٍ هيّض البال مرقبه
في راس عيطا والهبوب سكون
يبرح لك القاع البعيدة عن الغبى
وكل المراقب عنه تطمن دون
له قلت يا رجم الشّقا مرقب العنا
ما شفت سلفانٍ وجتك ضعون
يقول انا هذا مكاني ليا الابد
شاهدني اجيالٍ فنت وقرون
ياما شفت من سود الليالي وبيضها
وهبايبٍ تذري وغرّ مزون
وياما شفت من سرب الجوازي رتّع
وسباع الوحوش اللي علي يرقون
كان انت مذهب نشّد اللي على الوطى
حط الخبر بلك انهم يوحون
ويجزيك عن علمي رسومٍ تغيّرت
ولا كل من عطْيو خبر يلقون
ذكّر علي اللي مضى من جوارحي
وضّح لي المعنى على المكنون
ذكّرني ايّامٍ مضت حزّت الجهل
من المرّ والحالي شربت حفون
ليا غنّت الورقا تسمّعت صوتها
مدري طرب والّا تجر لحون
وتذاودني العبرات في خافي الحشا
اكنّها خوف الملا يدرون
اسباب الهوى لا بارك الله بالهوى
راعيه لا صاحي ولا مجنون
يدهور بغرّاتٍ كفى الله شرّها
يسوقك وله بالمشكلات غصون
يازين لذّاته وياشين لوعته
عقب الطرب لابد ما تبكون
نصبر لشهوات النفس بالجوع والعطش
ايّام يومن الصميل شنون
مضى اللي مضى واللي مضى ما يفيدنا
انتوجّد على ولفٍ رجاه ظنون
تعبير من جرّب وصدّر عن الهوى
مثل اللي عقب ناسٍ وهم يمشون
هذي حالة الدّنيا كفى الله شرّها
لا تجهلون بها ولا تنسون
ايّامٍ تقافا والليالي تسوقها
يمسن بلون ويصبحن بلون
تمهلّك الدنيا ليالي وتنتهي
لو طوّلت للغافلين تخون
تلهينا بزود ونقص والبعد بالامل
وسهوم المنايا مالهن حتون
تحفظ الليال اللي مضت من حسابنا
والعمر واجلك عندها مرهون
اوصّيك يابن آدم بع الهم بالنجم
ورزقك على اللي خالقك مضمون
يمشّيك نقّاض العزايم ويمنعك
واللي ومره الله عليك يكون
والصبر له فضلٍ وتحمد عواقبه
والصابرين لهم من الله عون
ولا تواخذ الجهال في كل زلّه
من العرف ما باعوا ولا يشرون
ترى جليس السّوء تدرك حبايله
خلّ الشر لاهل الشر به يجزون
لياما رفعت النفس عن ما يعيبها
يظهر عليك من الرّجال عيون
تكشف خفيّاتك وتعرف سرايرك
ويصير لك بالخاملات طعون
اوصيك بالتقوى وبالصدق والصخا
وترى المراجل ما يجن بهون
الّا بفعلٍ تطلق الوجه سمعته
على الواجبات امشي على القانون
تلقى بفعل الغانمات معزه
يزيدٍ وقارك واجرهن مازون
رجالٍ كما الهضبا بها الظل والذرى
وليا عطاهم ربهم يعطون
ازوالٍ تشابه ساترتها ثيابها
لا نفعهم حاضر ولا يرجون
لو الرّجال لها الرّجال فدايا
عن كل عشرة فدوهم مليون
لك وعليك من المشاريه يالفتى
تندّ العنابر والعفون عفون
على العفون من الرّجال دلايل
عن المراجل كنّهم يحدون
والعفن لا يعجبك لو كثر ماله
محروم منه وبالطّمع مفتون
يابو فريح اهدي لمن يسمع الندا
كلامٍ عليه المجتمع يرضون
ابرفع لك الجابه وبلكٍ تفيدني
خبير ولك بالمعجزات فنون
والمعذرة يا كامل الطيب والصخا
وانتم على رد الوفا تحرون
ولالي بطول الشرح عن كل ما بقى
عساكم على درب الهدى تقدون
رد الشاعر الكبير : خلف المسيعيد الجميلي على قصيدة الشاعر الكبير : فهيد الباطح الجميلي رحمه الله
يا مرحبا ترحيبة النّاس بالمطر
بالقيل ومن جابه بحرف النون
ترحيبةٍ من خاطرٍ سامحٍ بها
عداد من طبّ الحرم يسعون
وعداد ما تذري الذّواري من الهوا
وعداد من فوق الوطى يمشون
بالشاعر اللّي باصعب القيل يفتخر
أليا طلع بيته يجي مازون
فهيد ابو باطح سنادي وعزوتي
يصخّر بيوتٍ تصحي المجنون
أليا صار بالمجلس تونّس سوالفه
زحول الرّجال لكلمته يصغون
ينصح عن الميلات وابليس والهوا
وانا لمثله لا نصح ممنون
النّاس لو عدّلتها ما تعدّلت
طبايع وطينه والقدر محتون
يجونك اثنينٍ في طريقٍ واحد
لكنهم بالعلم يختلفون
احدٍ ليا منّك نصحته يستمع
يقبل واردك كنّك عليه تمون
واحدٍ ليا منّك نصحته بلشت به
ليا قلت له مخطي يقول شلون
تلقاه في سرد السّوالف شاطر
وليا حصلت القاله غدا بزّون
ترى الهذور يضيع حقّه بهذرته
ما يدري إن النّاس يفتهمون
يضحك له اللّي وده انّه يهايله
يبي عليه المجتمع يزرون
احفظ لسانك لا تصير مشعوذ
وتصير لمقباس الشّرور فتون
واحذر عن الغيبه وسبّ الغافل
ترى الحكي يطلع ميّتٍ مدفون
ما فيه مخلوقٍ عن العيب معتصم
الاّ النبي محمد المامون
لا شك بالذّكرى فوايد كثيرة
للّي ليا ذكّرتهم ياعون
والاّ الزمان مخالف النّاس من طلع
ما دام مع تبّع ولا فرعون
ولا دام لسليمان النّبي بلذّته
ولا دام مع هتلر ولا هارون
يومٍ تعافى به ويومٍ تمرض
ويومٍ تغدابه ويوم بدون
دنياك لو طوّل علينا نعيمها
دايم علينا سيفها مسنون
لاشك يابن آدم توقّظ عن الجهل
واعمل عملك لوجه رب الكون
أدّ الفروض الخمس واكمل شروطها
واحذر تميل لسيرة الملْعون
اوصّيك قطع الرّحم بالك تشير به
خلّك رحومٍ ليّنٍ حنون
وأدّ الامانه لا تهاون بحقها
بالصّدق والاخلاص لا تخون
والجار وصّانا عليه محمد
تحمّل من الجيران لو يخطون
وصّى على الجيران والضّيف والخوي
هذولا بدينك حقّهم مقرون
لا تحسب ان اللي عملته نسيته
عليك الشّهود اللي معك يرون
يشوفون ما تفعل وهم يكتبونه
تسجيل صفحاتٍ لها يقرون
شهود ميزانٍ على الصّح والخطا
وعند التّلاقي للحساب يجون
وحنّا بعلم اهل المعرفه نقتدي
نرْد الطّريق اللّي معه يردون
وانا اتكلّم حسب عقلي وعرفتي
لا ضامنٍ نفسي ولا مضمون
ولا انا وكيل آدم على ذرّيته
ولا غابنٍ فيها ولا مغبون
اللّي يغبن النّاس راع الطاعه
وراع المعاصي لو طلع لادون
ما قلتها قصدي تفخّر بقيلها
اهدي بها اللي عنه ما يدرون
والخاتمه صلّو على سيد البشر
عداد ما هزّ الهبوب غصون
على محمد صفوة الخلق كلها
اللّي عليه الركّع يصلّون
عليه صلاةٍ تملا الارض والسماء
ننّجى بها في يوم يجتمعون
يومٍ لا ملجا ولا عنه متّقى
تكْشيف ما يخْفى وما يبدون