الشاعر الكبير : فهيد الباطح الجميلي
نطيت لي رجمٍ طويلٍ ومشلوف
متعلّيٍ من فوق كل المشاريف
رجمٍ لطرّاد الولع يبرح الشّوف
مشليّدٍ دونه طمان ومياهيف
تلقى ظلاله كنّه القصر مسقوف
وتلقى الحمايم به تلجّا عن الهيف
لكْن حاديها سنا نار مقصوف
في خفقت الجوزا سمومه صواعيف
يا عيال يا متروّحينٍ على كوف
ياللي على غلظ الرّقاب المواجيف
مزينينٍ فوقهن عملت الحوف
وظهورهن للي ركبهن هفاهيف
يرعنّ بالخايع ثمر كل قفقوف
لحين تمّن نقضت الجزو بالصيف
للصّاحب اللي بالولع لافني لوف
عليه هلّيت الدّموع الذّواريف
يا ضامر السّرجوف والبطن ملهوف
ما انساك لو إني ورا نقرة السِيف
قلبي وعيني لك لو انّك ورا الطّوف
لا صرت قفوي حرت لك بالتّواقيف
والله فلا قصدي مذلّه ولا خوف
عندك حٓوٓلْنٓا والغلا زود تشريف
يابو نهودٍ مثل تفّاحة الجوف
ماهن من لمس الصغيّر مهاديف
يابو جديلٍ فوق الامتان مصفوف
شرّع على ردفٍ زها بالتّواصيف
ردفه سنام اللي على امّه خذا النّوف
تحظّه اللي درهمت للمشاعيف
اشوف منفوعي وانا عنه مصدوف
هو صار لي مثل المعزّب وانا الضّيف
حبٍ واحبك يالغظي نٓوْ معروف
كان انت طربانٍ ترى ما معي كيف