شسالفة هالصوت الكل يستانس عليه ويوم نسمعه النومه تصير أحلى بدبلات؟
اهو الناس أكثر شي تعرف المكيف القديم لأنه اهو اللي مر عليهم أكثر من غيره وهم لأنه مرتبط بذكريات الطفولة
بس بالصج نفس الصوت تقريباً تلقونه بصوت “وشّة” التلفزيون أو الراديو يوم يكون على موجة غلط، المخمّة الكهربائية، المروحة إذا كانت عالية، السشوار، ماي الحنفية، المكاين مرات مثل النشافة أو محرك الطيارة وهي فوق بالهوا، أو السيارة ومحركها.
هذا الصوت إسمه ضجيج أبيض أو بالانجليزي White Noise، يعرفونه كضجيج يجمع كل ترددات الصوت اللي تقدر تسمعها الإذن البشرية (بين 20 إلى 20 ألف هرتز). يعني مثل 20,000 تردد تسمعهم مرة وحده!
سموه ضجيج أبيض لأنه يشبه الضوء الأبيض اللي يجمع كل ألوان الطيف ويصير لونه أبيض، نفس الفكرة.
علمياً قاموا يستخدمونه عشان يغطي عالأصوات الغير مرغوبة مثل الإزعاج (راح أشرح ليش تحت)، اللي يسمع هالصوت -أو الضجيج بالأصح- راح يزيد عنده التركيز، يساعده على النوم، يخفف من الصداع النصفي (أو اللي يسمونه الشقيقة بالفصحى)، “يمتص” الأصوات الثانية ويخفيها بين تردداته، يخدر اليهال و -يكرم السامع- الحيوانات هم.
أحب أضيف ان حتى صوت الموج والبحر يعتبر هم نوع من أنواع الضجيج الأبيض، من جذي اللي يزعل يروح البحر أيام اول
، هالأيام الناس تروح الأفنيوز
عاد حتى الأفنيوز فيه شي قريب من الضجيج أبيض من كثر الأصوات اللي فيه يوم الزحمة
مصختها مو؟
لووووول
زين شنو تفسير هالحالة علمياً؟ ليش هالصوت مريح حق النوم؟
تخيل قاعد تسمع اثنين يسولفون بنفس الوقت، المخ يقدر يركز على واحد منهم بس ويلقط شوي من كلام الثاني، نفس الشي يوم تلقى ثلاثة يتكلمون بنفس الوقت راح تقدر تركز على واحد منهم بس بصعوبة شوي، أما إذا ألف واحد قاعدين يهذرون فوق راسك المخ راح “يبوّش” ولا راح يحاول يفكك أي صوت ولا يركز على أي صوت فيهم، يعني المخ بيهدا ويستريح
.
يعني إذا مخك مستريح و “مبوّش” من سماع ألف صوت ما راح يفرق معاه صوت أو اثنين أو حتى عشرة زيادة من الأصوات اللي يمك، من جذي راح يضيعون وما راح يعبرهم مخك ولا يركز عليهم ولا يحللهم ولا أي شي ثاني.
من جذي النوم يصير أحلى، ماكو صوت بيأذيك ويقعدك من النوم، مخك راح يكون مكيّف عالوضع ويخليك تنام أحلى نومة. يعني حتى موضوعي السابق (
عذاب ما قبل النوم) المفروض تنحل مشكلته مع صوت المكيّف القديم
هذا بشكل مبسط حيل عشان محد يتعقد، أنا شخصياً لي تجارب شخصية مع يهال بعايلتنا يوم كانوا يبجون أروح أدور على سشوار واشغله عندهم والكل يستغرب شلون يهدا الياهل وينام عبالهم حركة طالع فيها لوووول، وهم نفس الشي ليش الياهل يسكت يوم يطلع بالسيارة والناس عبالها الياهل يبي يغير جو
الياهل يرتاح من صوت السيارة والطريج يخدر وينام.
الحين شوفوا هالمقاطع وشلون اليهال يسكتون بسرعة بس يسمعون صوت الحنفية أو السشوار سبحان الله:
http://www.youtube.com/watch?v=kO6CR...layer_embedded
http://www.youtube.com/watch?v=P-Tow...layer_embedded
واللي يبي يسمع الصوت بدون ما يسوي لويه ويشغل مكاين وسشوار يقدر يسمع الصوت جاهز بهالموقع على ثلاث مستويات: الضجيج الأبيض والوردي والبني
(كلهم متشابهين مع اختلاف بسيط حيل بالدرجة والتردد حق الموجة الوحده)، الموقع على الرابط:
http://www.simplynoise.com/
وفوق هذا خذيت الأصوات من هالموقع ورفعتهم عندي على الروابط هذي:
1-
SimplyNoise.com -- White Noise.
2-
SimplyNoise.com -- Pink Noise.
3-
SimplyNoise.com -- Brown Noise.
أخيرا أقول تباً للسنترال والتكييف المركزي اللي خطف منا هالصوت السحري!
و من كثر ما شفت فيديوات اليهال ينامون