امس العصر مديت شوفي وسجيت
بأرض(ن) بها رجم(ن) طويل ورقيته
قاع(ن) بها لا اشوف نبت(ن) ولابيت
بس الحـــزوم وهمي الـلــــي رضيته
ياما مع الهوجاس دجت وتمشيت
واصور الماضي وش اللي جنيته
خاويت بالدنيا بها شفت ووحيت
وعرفت منها كل شي(ن) بغــيته
اخذت منها النفع والشين خليت
ورسمتها بالعمر درب(ن) نويــته
والطــــيبه مايوم عنها ترديـــت
الله وقاني والــــردى ماوطـــيته
احداً تقدا به وبه فعلاً اقديت
يدرا خويّه فوق مدرات صيته
حطّه على يمناك لامن تنخيت
وابشر بــــعزك ماطلبته خذيته
واحداً تجيه وروحتك زي ماجيت
لامقدراً خوه ولا صيت بيته
ايكوم احجاجه ليامنك ابطيت
هذا ردي الساس لامـــن قصيته
كم واحدن عايش حياته وهو ميت
وكم واحدن ميت وذكره لقيته
ومن لايقدر جيـــتك لا تعنيت
ماهو مسنع حاجـــــتك لانخيته
الشــــاعر / عبداللــــــه مسيعيد الحفر