قصيدة الشاعر الكبير / فهيد الباطح الجميلي رحمه الله
بالشيخ / محمد الضاري الطواله رحمه الله
مرحوم يا راع النّدى والشهامه .... علّك بحفظ اللي لبيته يحجّون
والجنه الخضرا لفايف عظامه ... في جاه من بامره مشى الغيث مضمون
شيخ الحرار اللي سريعٍ ولامه .... ضرمٍ على طلعه هو اللي يهدّون
اللي ليا طلّع على الجول هامه ..... عشّى طيورٍ بالقنص ما يتعشّون
حلّال عقد اللي قويٍ لحامه .... ذخيرة اللي من ورا الباب مسجون
ترجى الفرج من لحظته وابتسامه .. زبن الضعيف ليا انكشف كل مكنون
حياة من روح الملا باستلامه .... فلا جاء مع اللي ينزلون ويشدّون
عسى البقى للي يقوم بمقامه .... واخوانه اللي باللّوازم يسدّون
فارس لنا مثل السّند والحزامه .... وضاري لنا درعٍ رصينٍ ومامون
عليّ ابو مروي لزومٍ سلامه .... واسمّعه قيلٍ من الراس مازون
اميرنا شيخ السلف والجهامه .... ليثٍ لربعه في ذراه يتذّرون
سبع السّباع بنبهته واهتمامه .... مفراص ماص مصقّل الهند مسنون
الحق يمشي به ويفهم نظامه .... ميزان حق وبه هَلْ العرف يدرون
ليا استصعب المشكل يحل ازدحامه .... على العيا جبّار ما يتبع الهون
كحيلان ماهو من سلايل خمامه .... على قدايمهم بالافعال يمشون
ابوه قبله والاهل مع عمامه .... كل العرب من رايهم يستدلّون
افعالهم لمّن تقوم القيامه .... يدري به الله والمخاليق يدرون
عيال الشريف اشراف سر وعلامه .... من ماكرٍ جذبه حرارٍ يصيدون
الله يمهل له ويلحق مرامه .... وادعوا معي ياللي من الله تخافون
وصلاة ربي والسلام بختامه .... اللي خلق خمس الفرايض يصلون