اخذ القلم و اكتب يا عفات ما صار

جيب فكسار

اخذ القلم واكتب يا عفات ما صار
اكتب عن اللي ضايقته الطواري


ضايق وجالس بين حيطان وجدار
ونفسه تهوشه للقنص و البراري


نفسه تهوشه للصحاري و الاقفار
بأرض تخالط به طعوس وصحاري


بأرض وطاها السيل واسقتها الأمطار
يكثر بها جر المطر والمجاري


فيها استوى نبت الخزامى و الأزهار
تحري بها جول القطا و الحباري


تحري بها أجوال مواقيع وطيار
و تحري بها قص الأثر و الاثاري


تركب على جيبٍ من طراز فكسار
فوقه من اللي ياصلون المحاري


جيبٍ على الديان قادر و عبار
كنه على قطع الفجوج انتحاري


يقطع على الديان والقار مشوار
ما هو على بعد المسافات هاري


جيبٍ يزين منطحه كشح الأنوار
لا شب ليته كن ليلك نهاري


وخذيت للعزبة معاميل كثار
وزودت فيها بنـّها و البهاري


وتاخذ معك ما تشتهي و أنت مختار
ثلاثةٍ فيهم فزع و افتخاري


امشببين و من رجاجيل و أخيار
وكلٍ على الثاني بطيبه يماري


بأرض ٍ خلا تمشون مع فج الأنوار
تبون موطان الأهل و السواري


جيتوا مكانٍ ما يوصف بالاذكار
ودجتوا على مكانكم بالحذاري


وعسيتوا فياضٍ بها عشب و أشجار
محرين للصيدة بميّ الخباري


ترمون ما شفتوه بالقاع وطيار
كلٍ مولم شوزله ما يداري


و معكم من طيور الهدد واف الأشبار
اشقر عليه من الفراسة مواري


طلعة اليا منه طلع طلع منظار
و رفت جناحه تعجبك يالمجاري


صوايده مضرابها عنف و إصرار
اقو و اشطر من شطير الشباري


تستانس لشوفه على كف صقار
اليا كشف عن برقعه للحباري


لو طرت يالحفان و الطير ما طار
بالبال ما جاء لي بالافلاس طاري


يلحق اليا طال المدى عقب مشوار
ما هو على طول المسافات هاري


كنه على طلعه يبي ياخذ الثأر
عزم و نشاط و خفة ٍ و انتصاري


صوايده كم سيلت دمه الحار
و من صايده دمه على القاع جاري


من هدت الأحرار تحتار الأنظار
يا عنك جرحك بالمقانيص باري


قبل الظهيرة حين وقت الضحى اندار
كملتوا اللي جاء على البال طاري


صدتوا و حصلتوا من أنواع ما طار
ورحتوا تبون لكم غداء بالسداري


رحتوا تبون من السداري لكم كار
ودجتوا على كل السدر و المذاري


وجيتوا سدر من بادي الوقت ما بار
سدر بطرفها و فوق منها نواري


منزال أهلكم قبل ما الوقت يندار
وجيتوا مكان دلالهم و الوجاري


نزلتوا العزبة و شبيتوا النار
واركيتوا الدله على جال ناري


دله وبرادٍ و فنجال و بهار
في مجلسٍ ما به من إبليس طاري


هذا دوى نفسي اليا صرت محتار
حيث إنها هي رغبتي و اختياري


بأرض قفر نارد على مي الآبار
ابرك من الديره وريح المجاري


وسلم على الشايب و قل له بما صار
قل له ترى عافت كوته العباري


قل له ترى عافت كره مسكت الطار
عقب الجيوب اللي تدوس المحاري


سيارته ما تمشي إلا على قار
و لا ساقها ما هو على البر ضاري


سيارةٍ ما تقطع البر و الدار
و الله لبدلها و أزود المصاري


اشري بدلها موترٍ جيب فكسار
وإن ما قويته اشتري لي سفاري




الشاعر/عافت الاميّر