الشاعر : باطح بن فهيد الباطح الجميلي
السيل يسقي قاع عرعر وأبا القور
هاك الديار اللي برادٍ هواها
لعل يسقيها من الوسم شختور
من مزنةٍ هلّت ويمطر سماها
يسقي اتلاع معيّله غرب وحدور
واتلاع عرعر والعويصي سقاها
يشمل على حامر وينساق لجفور
وغدران لآهه والابيّض ملاها
من المرى للسيسبي سيله بحور
وجميع وديان الشمال يغشاها
لاجيت خطو الروض ليا الغثو مزبور
تاخذ ثلاث شهور ما نشّ ماها
ديمٍ على ديمٍ تقافى ومامور
رحمه من اللي عالمٍ في خفاها
يا الله يا عازل ظلامه عن النور
تقبل لدعوة عبدك اللي دعاها
ترجع لها من عقب الامحال ودهور
بريفٍ يعمّ اسهالها مع حصاها
وليا خذت سبعين يومٍ به كسور
تلقى الزبيدي شايخٍ مع كماها
يا حلو شوفتها ليا صارت قفور
اتونّس الكشّات واللي رعاها
لاجيت لك روضٍ له اسبوع ممطور
عشبه جديد وشايخٍ في ثراها
وتلقى البختري له نواوير وزهور
من وليته قفرٍ ولا احدٍ وطاها
وباطرافه القرّيص والشيح مكثور
والديدحان وقحويانٍ معاها
هذا هوى قلبٍ مع البر مجبور
والرجل ممشى بالصحاري مناها
اخير من ممشى بالاسواق وقصور
وشوارعٍ ما ينعرف منتهاها
والعمر لو هو طال تاليه مقبور
وكلٍ يموت وحاجته ما قضاها
ذا قول من هو شاف من وقته الجور
جرّب مرارتها وجرّب حلاها
آخر 10 مشاركات
الإهداءات
منذ /22-12-2017
الشاعر : باطح بن فهيد الباطح - السيل يسقي قاع عرعر وأبا القور
العرض العادي
