فرقاك عيد ~ الشاعر : عبدالعزيز المحارب

الشاعر : عبدالعزيز المحارب



طال انتظاري والجفن من غيبتك عاف الرقاد

اهيض لاجاء هاجسك واحن واجيب القصيد


اشتاق لك رغم الجفا رغم الهجر رغم البعاد

مليت من طول السهر والليل والوحشه وحيد


ما عاد باقي للصبر عجل علي خل العناد

ان كان تشفق للوصل وشلون تقسي يا عنيد


جيتك على وضح النقاء والا انت تدري بالوكاد

في دنيتي كنت العمر كنت الامل كنت الرصيد


اسلي الخاطر على ذكراك لاهب البراد

لجل اللقا كنت اسهرك فالليل والبرد الشديد


كنت الاماني والامان اللي اعيشه بالوداد

كنت القريب والمني بين الملا واثرك بعيد


كنت الملاك وطلتك تحفه ما تعرض بالمزاد

قربك ملاك أقارنه في ملك هارون الرشيد


اخذتني اخذت ضحي ياليتك اخذني هجاد

يا عل حبك للذهاب ان كان قربك ما يفيد


مشاعري اشعلتها واحرقتها وسط الفؤاد

لو كان بك ذره تحس احساس مابك يا بليد


ما كنت احسبنه غشى وجه القمر لون السواد

حسبي عليك اقولها والله على فعلك شهيد


حنا بشر نزرع وفاء باحساسنا لجل الحصاد

عل وعسي لكن ما فاد ادري ولاني مستفيد


حنا بشر وامالنا صعبه تجي على المراد

نمشي على كف القدر والله يفعل ما يريد


حنا بشر وانفاسنا واجسادنا ماهي جماد

بارواحنا دم ولحم وجروح تنزف بالوريد


كل ما مضي والذكريات اللي بقاياها رماد

بطشها للريح واتركها لك العمر الجديد


صحيح عينك ما بكت فرقاي في يوم الحداد

لكن ابعطيك الوعد بذبح على فرقاك عيد

صح لسان عبدالعزيز

وبيض الله وجهك ع النقل

يابن فهيييييد

تسلم يابشير

وصح لسان أبو فهد