بسم الله توكلت على الله:
عزالله اني طالع لوتعيون
البر عندي عكس جو المدينه
وشلي بناس مقابلين التلفزون
كل ٍ مركزبالدواوين عينه
ماهمهم الاوكالة يقولون
واخبار الاسهم عند مايا وزينه
هذا يقول بساع لازم تهربون
اهــبط مظلي وشتبي بالدفينه
اخبار جتني عبر خط التليفون
وسمعته من الناس عند الكبينه
وهذا يقول الصبح بكره تشوفون
ان كان ماصرت بكلامي جهينه
حلواني تنسب ولازم تعرفون
خلو كلام اهل الحسد والضغينه
والمشكله عقب النصايح يخسرون
ويطلعون من الخساير بدينه
ويجلسون من الشتايم يسوقون
ويبررون ان السبب عارفينه
ماباقي الا للمغافر يروحون
ويبلغون ان الدراهم رهينه
اللي يبي مليون ماجاه مليون
ضيع مكاسب نايمه بالخزينه
المال كنه صار ياناس فرعون
ياكثر طغيانه على عابدينه
ياهل الدراهم وشبلاكم تصيحون
اشوف كل ٍ عاقد ٍ حاجبينه
عندي نصيحه ليتكم تستفيدون
اشوفها بعيني نصيحه ثمينه
اما انطروها واصبروا لاتبيعون
والا ترى كل النتايج حزينه
والا بامانه شغلوا فلم كرتون
وارتاحوا من اخبار مايا وزينه[/size]
والسلام