الشاعر الكبير : فهيد الباطح الجميلي رحمه الله
الهوى يوم دورة بعت به واشتريت
الفوايد قليلة والخسارة يقين
والله إني على اثرهن ركضت ومشيت
اسهر الليل كلّه والعرب نايمين
راح وقتي وانا لاوين ومنين جيت
بين هذي وذيك العلم باكر يبين
كل ما شفت لي رجمٍ براسه رقيت
دار اهل صاحبي مرمس وهم شايلين
انغبن من غميضتهم وانا ما حكيت
ان شكيت افتضحت وصار مالي عوين
ما يجن العذارى لك على ما اشتهيت
الهوى عندهن ماله كفيل وضمين
صابني بالهوى غروٍ عليه ابتليت
والله إني عليه اشفق من ام الجنين
لو تكذّب علي اليوم باكر نسيت
له مطيعٍ مريع وكن ما فات شين
كل ما لاح لي لاموع يمّه سريت
واللّواميع كثرة من يسار ويمين
وكل ما جيت ابترك حبها وانتهيت
اعرضت لي وزاد الماء وخرب الطحين