الشاعر / باطح بن فهيد الباطح الجميلي
لا واهني من شاف فرقا الطوابير
ولا سمْع بالميدان ثابت وراحات
وما لبْس بالرجلين دس وبساطير
ولا سجّلوا له واجبٍ بالخفارات
العسكريه يالوجيه المسافير
لو هي شرف تعافها بعض الاوقات
خصٍ ليا منه حصل منك تأخير
ودّوك للقايد ومدّوك إضافات
وسجل عليك من التعهّد تقارير
وقّعت بالبصمه بخصم المعاشات
من فضل ربي لي حشيمه وتقدير
وملّفي ابيض ما كتب به خطيات
وعشيري الطيّب على الشر والخير
وإلّا الرّدي مالي بقربه علاقات
ترى الردي ملهود دايم مثيبير
لاحتجت له ما ينفعك بالمهمات
قلته وانا لي يا عرب مقصدٍ غير
ودّي مع البدوان في كل الاوقات
شوف الفياض اللي كستها النواوير
تزيد في عمري سنينٍ طويلات
الله على السجّه وبعض المشاوير
عقب المدن يا حلو شوف البداوات
لاجيت للي يكرمون الخطاطير
اللي لهم مواقف الطيب عادات
اهل دلالٍ مركياتٍ مباهير
فنجالهن يشدي خضاب الخوندات
وليا حصل طرد البنات الغنادير
اللي جدايلهن على المتن صفّات
على الشرف ما هي افلام وتصاوير
مثل بعض ناسٍ هواهم خرافات
نبي السموحه كان بـالقاف تقصير
إن كاننا قلنا خطيّه وزلّات
يقوله اللي يصخّر القاف تصخير
ليا نوى يصخر صعيبات الابيات
وصلاة ربي عد ما رفرف الطير
وعداد ما تطبع حروف المجلّات
على نبيٍ فسّر الدين تفسير
محمد اللي صادقٍ بالرسالات