البارحة نومي تقلب و تمليل
والقلب من بين الضماير يناوي
ما غير أوسع خاطري بالتماثيل
قاف ٍ على المعنى يجي له نحاوي
اليا ندهت القاف جاء له غرازيل
يجيك شين ٍ مستكن ٍ خفاوي
و الا ترى دنياك قد بذة الحيل
يا ما خذت من كل قرم ٍ نداوي
الرزق عند الله و لا فيه تعطيل
و انا بعفو الله وثيق الرجاوي
لابد ما للعسر يسر ٍ و تسهيل
و لابد ما عقب المرارة حلاوي
و المرجله يا كاسبين التنافيل
ما هي سواليف و هرج و مناوي
من لا يحسب لليال المقابيل
يصبر على الشدات عند الرخاوي
لا صار ما لك مع هل العرف تأويل
دوّر فهيم كل رايه عذاوي
فكر و ناظر للرجال المشاكيل
و اخذ الخبر منهم اليا صرت غاوي
دور من الربع الشريفين حلحيل
حذرا توفر بالعفون الهقاوي
العفن لا صعبت عليك النشابيل
ما هو على بعض المهمات قاوي
ما له على درب المروة مداخيل
و لا يدرك المعروف لو هو غناوي
ترى الرجال أشكال جسم ٍ و ازاويل
لكن بس الفعل ما هو متساوي
احد ٍ اليا منه حصل قول ٍ و قيل
عند اللوازم مثل خطو النداوي
يأخذ بفكر و عرف رأي ٍ بترتيل
اليا حضر هانت جميع الدعاوي
و احد ٍ تشوفه في محله كما الفيل
ما هو على درب المروات قاوي
مرتاح ما يدري عن العدل و الميل
لو تنصحه قال انت يا رجل داوي
و الله يا خطوات بعض الرجاجيل
ماني على قربه شفيق ٍ شفاوي
اللي اليا ركب الرشا بالمحاحيل
خلاك و أنحى مقفي ٍ ما يراوي
يشناك لو تعطيه شي ٍ بلا كيل
عن قربته ودك لحالك خلاوي
واحد ٍ بقربه ما قبلت التباديل
دوم ٍ ورى الشوفه بفعل ٍ رهاوي
عنده لذربـيـن النشامى مداهيل
حرص ٍ على كل المراجل شقاوي
حيثه شجاع و ماضي ٍ له مفاعيل
يقضي اللزوم بكل حال ٍ حياوي
عز الله انه يملك الروح بالحيل
بالطيب و الا بالغصيبه عصاوي
اليا بلاك الله بخطو المهابيل
خص الخباث مكثرين اللفاوي
عن الردي و الخبل و العفن ما سيل
اشره على الرجل الشريف الحماوي
و الله ما يصبر على الغبن و الميل
الا ردي الشان و الا الدهاوي
ما في يد المخلوق عقد ٍ و تحليل
الله يدبرنا بفعل متساوي
تمت و من عندي تحية و تهليل
على النبي مني سلامي هداوي