يا ما حلا نزلات ربعي في لغوف النفود
بارض الخشيم اللي يا عل الغيث يسقي جباه
يا عل يسقيه الحيا من مرزمات الرعود
سيلٍ على سيل غديره يبهج الكبد ماه
دار لاهلنا الاولين و مقدمين الجدود
يوم السنين الاوله و الوقت شينٍ قصاه
عاشوا بها ما حسبوا بالوقت نقصٍ و زود
ما ياكلون الا لحم ريم و عفر ما حلاه
ربوا بها فهود الزراج و نعم و هم الفهود
قصيرهم ما يشتكي من ضيم طول الحياة
جدي خلف هذا مقره عود يا حي عود
كريم يمنى ما كلا من دون جاره عشاه
و من عقبه مسيعيد ابوي و بالفعول محمود
طير السعد من طيب راسه يفرح اللي نصاه
شيخ العنيزان الجميع و لا ضميره حقود
نطح المهمه من طبوعه طيب الله ثراه
و ربعي هل الطولات كلٍ بالمراجل يزود
الكل منهم لو قصيته ما انت لاحق مداه
احباب و اقرابٍ و لا فيهم بغيض و حسود
و اليا بغى الواحد من الثاني لزوم قضاه
بنوا بيوت كن وصف رباعهن الحيود
مثل الجبال الشامخه ما فوقها الا سماه
هذي عوايدهم عساها كل عام تعود
ذكراه تبقى لاخر الاجيال ما احد نساه
هذي مواقعنا وطنا اللي عليها شهود
تشهد ثمايلها و رمل طعوسها مع حصاه
و ربعي فعول المرجله بايمانهم ما تكود
اولاد جامل ما تعدا من هذاك لـــ هذاه
خلوا منازلهم عليها مرمسات الشنود
بس ام سالم فوقها تلعب و تزعج غناه
عقب الوناسه و المنازل فوق جال العدود
كلٍ بنى له قصر و البيت المروبع طواه
و الوقت راح و لا بقى من لذه العمر فود
هالحين خلينا طراة الوقت للي بغاه
ما باقي الا حاجةٍ منها تبيح السدود
لا واهني اللي من اللذات ربه عطاه
وقت مضى راح و قضى ما باقي به قعود
و العمر لو يطرخ ليال (اقريب منتهاه)
شيباننا راحوا و حنا عقبهم بالوجود
و مجلس خلف جدي بداره من يمره لقاه
دار لنا حنا لها و الله ولي و معبود
معروف موقعنا و بيّن لعنبوا من كماه
اخوان صايد لاصمدنا طيبين الصمود
و اللي يبي الزوده علينا نكسحه و نعصاه
حنا العمود لورثة عنيزان حنا العمود
من جدنا عنيزان الاول لين تالي ضناه
و انا لهم لا صار حبل المعضلات معقود
اقف لهم وقفة رجوله و الكلام احماه
و اليوم حنا في امان بظل حكم السعود
حكمٍ يعدل الظلم حكمٍ عالي مستواه
امن و امانٍ من جنوب الى شمال الحدود
و من شرقها لــ غربها كلٍ رقد في ذراه
من جود حكام السعود ضعوف الامه تجود
جزل عطاهم و الله اللي كاملٍ في عطاه
من عهد ابو تركي الى سلمان اكرر و اعود
حكمٍ عدل و من عدل بامره على الله جزاه
الله يثبتهم على الطاعه و صدق الوعود
دعوة نصاح و من دعاء بالحق يقبل دعاه
و الخاتمه عطفك و لطفك يالغفور الودود
و صلوا على محمد عداد صيتمنا و الصلاة
قصيده. الشاعر. /سعد بن مسيعيد الحفر الجميلي