يا بنت يا سيد البنات الرعابيب
ياللي عليك من الغزّيل علامة
الزين بك موجود ما بك عذاريب
خد و نهد يشدي لبيض الحمامة
لا باس يابو قذلة له عباعيب
شقراء من الهامة تعدى حزامه
زينك كمل ما فيه شك ٍ و لا ريب
لولا الذكاء حدرك تسعين قامة
الرمي يخطي بعض الاحيان و يصيب
لو ما رميتك يا ضبي العدامه
يوم ٍ لقيتك من كبار العواقيب
يا ليت قبل ألقاك جتني سلامه
أوحيت من بعض السوالف ذباذيب
كلمة خطا و ألحقك منها ملامة
وش عيبنا ياللي تقولين بك عيب
العيب باللي ما يقدر كلامه
من شبتي لين امتلآ عارضي شيب
ما جيت في درب الردى و الرخامة
قالوه قدامي رجال معاطيب
العلم ما يقرا خطاة الفدامه
عسى يحدونك حساد ٍ مغاضيب
و يطلع نصيبك مع كبير العمامة
عود ٍ مدلبح و القوايم محاديب
أنتي شباب و هو تراقل عضامه
في ذمته تبقين غصب ٍ بلا طيب
و يسهرك حزنه عن حلاوة منامه
ان كان لاهل الحق حق و مطاليب
يالله تقبل دعوتي بالتزامه
الشاعر / سعد بن مسيعيد الحفر الجميلي