قصيدة الشاعر الكبير : فهيد الباطح الجميلي رحمه الله بالملك فيصل بن عبدالعزيز آل سعود رحمه الله
مبداي بالله عد ما ذعذع الهوا ... له الملك والمرجع إليه دليل
على ما يشاء يفعل بحكمه وإرادته ... ولا احدٍ له برد الكاينات حصيل
اجل النفوس من الكريم محدد ... وغيب الليالي ما لهن كفيل
الاسباب تجري والقدر يسبق الحذر ... ولابد من عقب المقام رحيل
ابديت ما كنّيت من حر ما جرى ... قلبي حزينٍ والفواد عليل
سمعت لي علمٍ كفيتو شرّه ... وقلت السّو يبطل عن كلامٍ قيل
وسألت عنه ان الكلام مثبّت ... وزعجت لي صيحه وراها ويل
من سمعها واكبرها من فجعه ... خسارةٍ يضرب بها التمثيل
عفا الله عن فيصل ملكنا الراحل ... من عفوه اللي ما يمد قليل
عسى الله يلطف له بعفوه ورحمته ... حيث ان الدعاء للمستحق فضيل
يا الله يالمعبود يالفرد الصمد ... عساه لك يوم الوجاه دخيل
تجزاه منك الخير مع صالح العمل ... بنهورٍ عليه اثمارهن ضليل
يا علّه مع الابرار خلده ومسكنه ... بالجنه اللي ما لها مثيل
ما عودٍ المسلم يجازى بما فعل ... من اللي يقدم بالنوال سبيل
ابونا العطوف اللي ربينا بنعمته ... نشكر وفاه لنا بكل جميل
فقيد شعبه بالعروبه كلها ... له الرّايه البيضا بكل طويل
يا الله يا جبّار يا سامع الدعاء ... تجبر عزانا يا قوي الحيل
تجبر مصيبتنا بعز ملوكنا ... عساهم لنا ذخرٍ إلى أتلا جيل
اليا غاب نور المملكه جاء مثله ... مثل الشمس نوره عن ظلام الليل
خالد ولد عبدالعزيز الفيصل ... شيّال من حمله عليه ثقيل
صديق الصديق وكاس مرٍ على العدا ... ماص الجوهر اللي من اخباه صقيل
وفهد ولي العهد عسى به البقا ... الله يوفّقْه السعد حلحيل
مثل العقاب الصيرمي الهيلع ... يعجبْك باللي للخيال تخيل
وكل السعود الله يساعد حظّهم ... سيوف بحق اللي تعدل الميل
كرام الوجيه كبارها مع صغارها ... لهم يشهد التاريخ بالتفضيل
الملك يزهاهم وهم يستوون له ... حلّالة المشكل عن التشكيل
هذولا هل العوجا مهدّية الصعب ... ليا صفا الصافي من الغرويل
تدرا عواقبهم ويرجى نوالهم ... ومنهم عدو اللي يصير ذليل
تشمل فضايلهم على البر والبحر ... حشى ما حْكا فيهم بقال وقيل
ربينا بنعمتهم وعشنا بفضلهم ... ريفٍ مثل روضٍ كل يوم يسيل
وحنا بعون الله وحيله وقوته ... حنا لهم خدام بالتكميل
وختام هذا بالصلاة على النبي ... عدد ما كتب حرفٍ بخط النيل