الشاعر الكبير / فهيد الباطح الجميلي رحمه الله
انا شسويت بالله يا زماني ---- على اجل انّك بهذا تمتحنّي
تهددني محابيلك بياني ---- اخلي المشكلات ويلحقنّي
عن المسيار ليت الله نهاني ---- حبايلهن يصيدن واشبكنّي
تركت الحب والمرسال جاني ---- ومكاويه القديمه ما برنّي
من اللوعات جاني ما كفاني ---- ومشاهيب العذارى لقّعني
بمشاكلهن كيف الله بلاني ---- ركضت خلافهن لين اتعبنّي
نطحني من سهم عينه رماني ---- وعطاني بالهوى رمح المطنّي
عليه اللبس مثل الديدحاني ---- زهى فوقه وهو بالزين فنّي
يميل به الهوى عوده لياني ---- مثل ريح النفل جيبه يبنّي
مضى من عمرها سبع وثماني ---- هذي قيمة سنينه يحسبنّي
بلوجٍ بشرتٍ ما هي جباني ---- عليها المترفات يوصفنّي
طلبت الزين منه ولا عطاني ---- نواش من الثمان وصد عنّي
ايتبلّج لي بمجلي الثماني ---- سلب عقلي وضاع العرف منّي
له استيسرت يومنّه ولاني ---- ابي عفوه وهو ما عفّ عنّي
يقول انت المحيّل بامتحاني ---- انا المحتاج والّا انت متهنّي
تخيّرت التوجد بالاغاني ---- امثّل باللحون وبالتمنّي