القرم غازي

يا راكب اللي من حفيزه مجهز

توه بتمرينه جديد الطرازي



جمس شكمانين ممتاز لا لز

من مصنع ٍ في زين الإنتاج فازي



اليا همزة سليتره ما يبي دز

و يسوقه اللي يفتهم بامتيازي



اليا عطاه اثنين من موقفه فز

فزة قطاة ٍ شايفه فرخ بازي



و العج من ويلة خلافه مركز

مثل النجال اليا ضرب له عزازي



مع منظره يعجبك شوحه اليا نز

مضبوط ما به رجة ٍ و اهتزازي



اليا عطيته نمره الترس يرمز

فيه البكم يرجس و رادو و جهازي



يا سايق الجمس المعنى تعنز

مني توجة يمة القرم غازي



سلم علية و قل تراني ملعوز

و لا فادني طب العرب و التعازي



اشكي لك أحوالي و بالحيل ملتز

دوّر هوى بالي ما انا عنه جازي



افزع تراي من العزا ير ملكز

و اسرع بمردود الخبر بالنجازي



ما أريد منك المال عساك في عز

تغانم الفرصة لنا بانتهازي



على الذي حبه بقلبي تمركز

غديت ضيق خلق كني حجازي



و الرجل حارت مير انا أكزها كز

يا غازي افزع لي تراني متوازي



تلقاه بالنشده و تقدر و تحرز

لا هو بمن شمر و لا هو برازي



عليه قلبي بين الأضلاع ينجز

و حبه سكن بأقصى المعاليق لازي



الله على من مز من مبسمه مز

مز الرضيع اليا لقى الديد حازي



موتي بحجانه اليا خزني خز

يقدر على ذبحي و لا له مجازي



يا عود ريحان ٍ مع الريح يهتز

يعدل على ساقية مي ارتوازي



و العين عين اللي بمشيه تخز خز

ريمية قادة فروق الجوازي



ابو نهود ٍكنهن بيضة الوز

حمر ٍ يشيلن شلحته بارتكازي



عليه كن الكبد بالموس تنحز

و الا يهذبها شطير القزازي



و أنوح نوحات السجين المحجز

و الا الخلوج اللي طواها النحازي



العشرة اللي كل أبوها تلزلز



شيّن شرابه مثل در العزازي



ان كان ما بك لي حمية تبرز

عن فزعة ٍ تفشل ترى لي مجازي



و القاف عن تيهت معانيه يكنز

و ابخل بعدة عند راع المهازي



عطني من أفكارك دلايل و موجز

حيثك غزير المعرفة ما ترازي



و صلوا على اللي بالشفاعة تميز

نبينا اللي بالخطأ ما يهازي





الشاعر / سعد بن مسيعيد الحفر الجميلي