نوب برد و نوب صيف

الضحى نطيت لي مرقب ٍ رجمه منيف

ماكر العقبان و الباز و الحر الصقر



يوم وايقته و حولت من رجمه معيف

بش دم الرجل من كثر ما ارقى و انحدر



ول يالمرقاب ذكرتني غرو ٍ عفيف

ليتني ما جيت في مرقبه عقب العصر



جيت ابستانس و حولت في حال كسيف

من غرابيل الليالي و لوعات القدر



من عشير ٍ لا ذكرته غدى عقلي حفيف

جادل ٍ تفرح بشوفه و ينقاد النظر



يا نعيم العود ما احط لي غيرك وليف

ما عنيت و جيت لولاك مالي بالحفر



القدم يحتار لاقفيت منك امشي و اقفيف

لا تخرب عشرتك خل ربي لك ذخر



صاحبي من ماكر الجود و الساس الشريف

هو شفاة النفس و الود من بيض و سمر



يا سمي الترك يالترف يالطفل العفيف

يا صغير السن ياللي نهيدك ما انكسر



لا تغلى و انت غالي ترى جرحك كليف

واهني من لايمك دام لذات العمر



الفلك يندار نوب برد ونوب صيف

ما احد ٍ يعلم بغيب الليالي و القدر



لايم العشاق علّه عماوي ٍ كفيف

مع عمى عينه عسى عظم ساقة ينكسر



اشهد ان افراق الاحباب ذنب و عمس كيف

يوم شفت الترف شالوه و انووا بالسفر



راح و اقفوا به و عيني غدت تذرف ذريف

و الحيا كمل و بيحت سدي و الصبر



ما درى باللي جرى لا شريف و لا ظريف

مير اونس خاطري يوم اجي داره و امر



فوق داره يلعب الطير عجل ٍ بالرفيف

يكسر الجنحان ما جاب علم و لاخبر



ول ما عينت لي صاحب ٍ ماله وصيف

علّ دار ٍ حلّ فيها يحل بها المطر



علّ يسقنه سحايب هماليل الخريف

لين تشبع به رواعيه من قبل الشهر



و يقبلون لنا ونقبل لهم و القاع ريف

بس اهلنا و اهل الترف و المنزل قفر



تنظبط فيها الوناسات من عقب المصيف

لاجتمعنا فوق جو الحدق بارض الحجر



بين خلان ٍ و اصاحيب ما فيهم حليف

و انت اشوفك بالوطن عندنا يا اغلى البشر



يجمع المقطان بالقيض نزل ٍ له صفيف

بين خال و عم و اهل الغضي فوق المقر



و اخذك و اسعد بالايام يالطفل العنيف

وهبة ٍ من وال الاقدار باخذك ننتصر


الشاعر سعد بن مسيعيد الحفر الجميلي