الشاعر : سعيد المحطب - قصيدة وطنية

الشاعر : سعيد المحطب


تعصف بي افكار القصيد وبحر يلطم في بحر
فكري لها مرسى الامان وبالسماء منزالها

اغوص غباات البحور السود واختار الدرر
من غالي الدر الثمين اختارها واصحالها

واصبها صب الذهب والسوق له عرف ونظر
ترجح بميزان الذهب لو زاد صرف ريالها

اسمو عن الهزل الضعيف بفكر وادراك وبصر
الهزل ماهو للي هدف كب الهزل لهزالها

والجزل في سد شنبي والمبتدا بعده خبر
الله يجملني بطيب افعالها واقوالها

ودام المواقف حامية والشعر له دور وحضر
ألد عيني للسماء والخيل من خيالها

المفردة درة ذهب والفكر سطرها فخر
توشحت خضر الثياب ونخلةٍ لظلالها

وشهادة الدين القويم شعارها بالمختصر
والسيف يلمع في يدين زحولها ورجالها

والعاصفة ثارت لها والحزم عنوان الظفر
قد قالها في ماضي الازمان منهو قالها

الحزم عزمٍ مع ظفر والترك فركٍ وانعثر
سم المعادي قالها تحفظ لكل اجيالها

وسطر بها سلمان بن عبدالعزيز اسمٍ شهر
يوم المجوس استفرست شيطانها غنالها

واستنجدت كل اليمن تنخى على حزام الظهر
باسم العروبة تنتخي شيبانها واطفالها

الحوثي افسد بالوطن والقتل بصفوف البشر
لبى الندا سقم العدا حنا العرب وابطالها

واعلن على اذناب المجوس الحرب من قبل الفجر
في لحظةٍ هز الدول توقيتها وارسالها

ياسيدي سلمان يادرع الوطن مامن عذر
المعركة ياسيدي حنا لها حنا لها

حنا الشجاعة باللقاء حنا الشهادة والنصر
النصر نرسم له خطط بفنونها واشكالها

ونستبشر بعطر الشهادة كان فاح اجمل عطر
لابشرت بالجنة اللي كلنا نسعى لها

حنا جنود اسلامنا واحفاد ابو بكر وعمر
حنا هزمنا قيصر وكسرى بفعل اشبالها

اضرب بنا عرض البحر وانحت بنا صم الصخر
زلزل بنا اقدام العداء بسهولها وجبالها

جندك معك ياسيدي اشر وحنا بالامر
مال المجوس بدارنا موضع وحنا عيالها

سطرتها باسم الوطن والشعب ماهاب الخطر
الله يجملني بطيب افعالها واقوالها