قال الاديب اللي بالامثال صراف
مثايله تعرف ومعروف قيلـه
دامي ولد حمدان لا مابي خلاف
ولد الكريم اللي فعوله جزيلـه
وعمامي محمد به الطيب ينشاف
وابو طلال اللي تبين جميلـه
والخال لا عفن(ن) ولا هوب بلاف
كلن لاجاء طاريه ينفض شليلـه
مثايل(ن) مني على نهج الاسلاف
من سمعها ماملها تستميلـه
اغرف بحر وانحت سخر وأصخر القاف
لا ما تكون بالمعاني مخيلـه
سحابة(ن) تضفي على كل الاطراف
منها يضيق بكل وادي مسيلـه
ماصابته عزب من الكاف للكاف
طب النفوس الضيقات العليلـه
وقبل امس بين بالسماء نور كشاف
نذيرنا اللي جاء يبشر بسيلـه
واستبشرت نفس الهواوي بما شاف
من عقب عد(ن) للشهور الطويلـه
واهل القنص صارو جماعات واحلاف
وكلن على المقناص عزم رحيلـه
متفاهمين بسلم الاصحاب عرّاف
مثل الخليل اللي يداري خليلـه
من بينهم كيف الرجاجيل طواف
فنجال زادت طيبتة من عميلـه
جلساتهم حلوه ولانامو اخفاف
كلن على ما قيل يسبق زميلـه
وانا ترا نفسي لما قلت مولاف
واللي تولع توبتة مستحيلـه
ويانشد(ن) عنا ماحنا بالاغداف
برض الحماد اللي صمدها سهيلـه
منزالنا بيّن على راس مشراف
ماننزل الا فوق راس الطويلـه
البيت مبني(ن) على بعد ينشاف
بالقيصمة والا بالارقط تخيلـه
وياراكبن من فوق جمس(ن) ماهو هاف
جمسن جديد وهو قديم(ن) موديلـه
جمسن الى منه مشى يرجف ارجاف
بالقاع سوىّ من دروبه نثيـلـه
منصاك محمود السجايا والاعراف
الصاحب اللي مايحب الفشيلـه
لابو محمد شوق زاهية الاوصاف
شوق الهنوف اللي تكد الجديلـه
سلم عليه وقل ترا القلب منلاف
لوف الذي حمَل حمول(ن) ثقيلـه
سواقه اللي من طلع مابعد خاف
يسري لحاله بالمساري دليلـه
حط المراكز من ورى ظهره خلاف
وغرب وراح وساري الليل ليلـه
وقل يابن عمي صاحبك صابه خلاف
كله سبب خل(ن) ذبحني بميلـه
ازريت احايل به وهو بي ما راف
لا قلت هانت شب خلي فتيلـه
العام انا وياه خلان و اولاف
واليوم صار لكل واحد سبيلـه
عزاه جرعني من السم زعَاف
والعام يسقيني حلا سلسـبـيـلـه
عليه عضيت النواجد تحساف
وعليه عيني بالعباير هميلـه
وعليه جاوبت النوايح بالاهتاف
ماغير اروبع من قصيدي واشيلـه
وجدي عليه وجود من جيب بكتاف
تنفيذ حكمه يوم عيّا قبيلـه
او وجد منهو فاخته شوف الاسلاف
في شوبة الجوزا وقطر صميلـه
يامسندي يامسندي نسل الاشراف
شفني براي(ن) ماندور بديلـه
خابرك بخص(ن) بالمحبه وعراف
كيف السوات ودلني بالوسيلـه
واختامها مني صلاة(ن) بالالاف
على الرسول اللي تبعنا سبيلـه
الشاعر/ صالح حمدان رشيد الطرفاوي