طاح المطر في شعبة انصاب والريع
نبي لنا ياراعي الجيب مقنــاص
تكفى تراي مولع بالمطاليع
زود على الولعه تولعت بالشاص
جيب جديد ولايعرف التقاطيع
ماهو من اللي كلما دست له غاص
جيب سرى مثل البروق اللواميع
وارد زمان و لانبي فيه مخلاص
تكفى تراني لو تحضريت ماأطيع
ودي أجرب هدت الطير قصـــــــاص
حر اليا شاف الحباري المراتيع
زند حديد ومخلبه تقل مفــــراص
أنا أشهد ان الطير يشكي البراقيع
من بعد ما زنده للأرقاب فصـــاص
نبي نوسع خاطر الطير توسيع
أنا أشهد ان الخرب لاقابله حاص
نبي نشوف ديارنا والمرابيع
نشرب لنا دله ومقداعها خـــلاص
نبي نرجع زهرة العمر ترجيــع
قبل تجي للروح علات غصــــــــاص