درس خذيته من الايام وأعطيته

يا كـم تحدانـي الوقـت وتحديتـه
ويا كم قسى وقتي وكم شفت ميلاته
ويا كم تحملـت شطاتـه وقاسيتـه
وأنا صبور على جـوره وشطاتـه
وأخفيت سدي ما بينتـه ولا أبديتـه
مـا ودي أبينـه والنـاس شماتـه
واللي تمنيت مـا جـا لـو تمنيتـه
والوقت ما عوض الرجال ما فاتـه
يا اللي تبي الطيب لا دورت لاقيته
الطيـب راعيـه بينـة علاماتـه
لا تخاوي إلا عديم ظاهـر صيتـه
قد بين الوقت صولاتـه وجولاتـه
مجـرّب بالمراجـل عامـر بيتـه
وقت المواجيب ما يحسب خساراته
يفرح اليا جيت له عاني وخصيتـه
وان غبت يذكرك ما ينسى صداقاته
واليا بدأ لك لزوم جاك مـا جيتـه
من طيبه ومن وفاه ومن حسن ذاته
وألا ردي الأصل لامنـك خاويتـه
تلقى مساويه مـا تلقـى حسناتـه
ان جا الرخا يركبه عشرين عفريته
وأن جات الأزمات لا وده ولا هاته
روابعه عن دروب العـز حاديتـه
وعلى دروب الردى تفتر موجاتـه
واليا ومنته على الأسرار واعطيتـه
ما سلمت من بوقه وغدره وحيلاته
ما هوب يصفي معك لا منك صافيته
يضحك بوجهك ويخفي عنك نياتـه
درس خذيته من الأيـام وأعطيتـه
والعلم شاره ويكفي الحـر شاراتـه
والباب عن معظم الأصحاب صكيته
إلا عن اللـي تشرفنـي علاقاتـه

أخـــــوكــــــم غـــــضــــب الــــــشـــــــمـــــــال