قصيدة الشاعر : يوسف بن معطاب بمناسبة تخرج الملازم أول : مسيعيد بن سعد المسيعيد الجميلي
ليا ذكرت الصحبة اللي ما تنسيك الصحيب
تطري علي جيتك لاوطانك بعد هجرانها
جيت وفيٍ رافع راسه على حشمه وطيب
وكم من ربوعٍ في مجيك نضمت قيفانها
اكن لك فرحة حبيبٍ ما تخلى عن حبيب
واليوم والله فجّرتني وافتحت بيبانها
فكت مرابط قيدها ثم طلعت طلعٍ غريب
واستبشرت تستقبلك ب ورودها واحضانها
من يوم اعرفك شامخٍ فيك الهقاوي ما تخيب
تاقف بوجه المعضلة لا ولعت نيرانها
عندك من الحكمة نصيب ولك من الدولة نصيب
والله يعز اللي تشد الجهد لجل اوطانها
لو كان للطالات نيشانٍ ومضرابه صعيب
ولو كان للطالات خيل موسعٍ ميدانها
كسبتها كسبة يمينك وانت ذيبٍ وابن ذيب
وامسيت خيال الخيول وصايدٍ نيشانها
جدك مسيعيدٍ ضيوفه ما تذوق الا عصيب
ب وقتٍ به العربان خافت ينصرف دنانها
وجدك خلف راع الجوازي ذا طريح وذا صويب
وهذي يقلّطها وذيك تعّلق ب سيقانها
اقبلت للدار العريبة وانت بالمنسب عريب
دار السعود اللي تولّى الحكم من جدّانها
ساروا على حكم الكتاب اللي به العلم العجيب
والدار رويت عقب ما وردوا على قلبانها
توارثوا حكم العدل ما عندنا شكٍ وريب
لين اسكنّت واستعدّت من حكم سلمانها
ياابو سعد يافخرنا يالعز يا نعم النجيب
واقدم على روس المعالي عز وانت حصانها
واهلاً هلابك عد ما عدّيت يالصدر الرحيب
يومك تعوّد بالسلام لدارك وسكّانها
.........................................