محاورتي مع الطير

السلام عليكم ورحمة الله وبركاته

كيف احوالكم اعزائي الاعضاء
طبعا تعلمون ان اليوم يوم خميس 000 وعندما قمت لصلاة الفجر وصليت ماجاني نوم رغم اني متحلف بالنوم نظرا لكثرة عملنا ( كاشخ انه موظف

مالك بالطويلة ركبت سيارتي وسلام ياخط حفرالباطن 0000 لاما جيتي لي شعيب يسار الخط 000 وانا اميل عليه 0000 نسيت اقولكم اني مصلح شااااي بالدفايه وماخذ خبز وقشطة من المحطة

حولت ونزلت عفشي ( دفاية وكاسة ) وجبت الخبز والقشطة وجلست افطر0000 المهم ترى بجنبي لي رجم صغير شكله ماكر طيور 00000 المهم اني قبل لاكمل فطوري وبالي رااااايق 000جا هاك الطير ووقع

بالرجم0000 ناظرت للطير كاني حاسده على طيرانه وانه يروح ويجي ماحد يمنعه
قلت بنفسي طوير ولايفهم كلامي ماهو فاضحني لو اهيجن
والله وانا ابدى اهيجن 000 واسند عليه لاني ضامنه مايرد

لي صاحب ٍ ياطير زود همومي = ابني صروح الحب يرجع يهده
مدري جفا أو هو بحبه كتومي = او هي من اللي بالهوى مستبده

]والله يوم خذيت وان الطير بلوى من البلاوي طلع اشعر مني وانا لي ساعة اهيجن يالله جبيت هالبيتين لا وكاشخ بعد000 وقالي

شكلك وقعت بشخص قلبه ظلومي = ومعذب قبلك جموع معده
ان طعتني عن حب مثله تشومي = باب ٍ فتحته طع عشيرك وسده

قلت 000 افا 000 انت شاعر اجل شد حيلك ياجمعه وحاول ترد بسرعه زي مارد عليك بسرعه والله واعصر نفسي واجيب هاكالبيتين وانا مستانس قلت له

ياطير شكلك ماتعرف السلومي = ماتفتهم درب الهوى والموده
ماعذبك غرو ٍ زهى بالهدومي = راعي جديل ٍ حدر متنه يكده

سكت الطير شوي 0000 وقلت خلاص هزمته واكيد هو بعد يحب مثلي ولا يقدر يرد 0000 وانا داله وانه راد علي وقاااااااال

الحب مالي به ياجمعه لزومي = هم وسهر والنوم عينك ترده
زود ٍ عليه الناس دايم تلومي = واخاف ياجمعه تكاثر عقده

لا ويعرف اسمي بعد 0000 وشهالبلية اللي وقعنا بها 000 عز الله انا بلشنا 000 وارجع افكر ثانية واعطيه بيتين جدد 00 قلت ابقوله انك مرتااااااح بالنوم والا انا ويني ووين النوم

هنيت من مثلك لقى حلو نومي = مانته شبيهي عاف نوم المخده
كل مانقول الحظ يرجع يقومي = يجيه شي عن وقوفه يلده

قلت احط عذري بالحظ اغديه يبعد عني 00000 اثره طلع داهية ومتشفق للشعر ويدور هزيمتي باي وسيله 0000 قلت وانا ولد ابوي ماتهزمني 00000 قال الطير لي

خل العذر . بالك لحظك تلومي = منهو يسب الناس يسمع مرده
والغيث ماينزل بليا غيومي = لاتبتلش بالحب جزره ومده

طلع ابو الشباب نااااصح وشكله متلكع من الحب 00000 شفت مالي عذر ولازم افتح له قلبي 0000 هذا طير ولهو فاضحني 00000 ولا يعلم علي قلت بقلب مليئ بالحزن

الحب طوقني وصرت محكومي = من واحد ياطير معزول قده
من عينها ترسل شطير السهومي = استر على ياطير من باح سده

تذكر الطير بداية الابيات اللي قلتها اول ما هيجنت 00000 واستشهد بها بنصيحته قائلا

ابنصحك كانك لنصحي ترومي = اسمع كلام صويحبك لاترده
خل الهوى واطلب لذيذ الحلومي = انس الفتاة الجامح المستبده

]نسيت نفسي وصرت اهذري بحكي من غير شعور كأن هذا الطير صديق من قديم واعطيه كل اسراري00000 رديت عليه وقلت

يلعب بي التفكير باوقات نومي = لاجيت ابرقد ضاح لي ضو خده
اقوم احسب ساهرات النجومي = عذب موده لارحم بي جده

المهم طاااااااار الطير 000 وتوراى عن الانظاااار 000 قلت اكيد انهزم ولا عنده رد 000000 والله وانا استانس بانتصاااري مع ان قلبي به بعض الحزن لانه ذكرني وخلاني لاهو اللي ريحني ولا هو اللي كمل نصحه000 بس يكفي اني هزمته000 جلست بعده حوالي ساااااااااعة وقلت بنفسي ما بها ياولد جمع قشك وروح والله وانا اجمع العفش ( دفاية وكاسه ) وانا اشغل السيارة 000 مادريت غير ان الطير رااااااااااجع 0000 ييييييييه هذا وشرجعه 00000000 على طول من غير لا سلام ولا احم 00000000 قال لي

شكلك عنيد وطالب ٍ للغمومي = صبري ترى وياك قفلت حده
مادامني من فوق بيته احومي = وليه ماقولك لخلك اعده

قلت تكسب بي معررررروف 000 ولا راح انساااااااه لك 00000 قال 000 قلي وشتبي تقول لهااااا قلت له قل ( كلام مخفي مايعرفه الا الله ثم انا والطير ) وبادرته بهالبيتين تاكيد على كلامي

ياطير ياللي فوق بيته تحومي = اخذ الخبر مني لخلي ووده
واياك ترجع ماتجيب العلومي = لازم جواب صويحبي لي ترده

قال انتظرني هنا ولا اطول عليك 00000 قلت ابشر 00 000 استغربت مارد علي باي بيت 00 الله يستر 0000 جلست ساعة ثانية 00طووول علي وقلت اكيد سوى مقلب بي 000 ماجريت وانا جالس افكر الا وهو راجع 0000 وليته ملرجع زود همي هم 000000 قال

جيته وقلت انك معاه مغرومي = وليه عنه يافلانه مصده
يقول مالي في غرامه لزومي = درب الهوى ما انا له مستعده

قلت بقلبي0000 ول ما اكذبك فشلتنا الله يقطعك 0000 0 بس انا حسيت انه يكذب علي ( يبرد فشلته : قلت بنفسي هالطير هذا كذوب وبين على وجهه بس خلني اساله وين بيتهم

يا انك تقول الصحيح او الحين او تمشي ولا وتوريني وجهك0000 قلت له

ان كنت طير وماكرك بالحزومي = عطني خبر لصويحبي وين حده
او بالعجل ياطير عني تقومي = ترى الكتاب مبين ٍ من مرده

المهم الطير من سمع كلامي شلع وطاااااااار وراح ولاشفته للحين 000بس ماراح الا حط بقلبي لكعه وخلاني اهوجس 000 والله يستر من تاليهااااااااا

امل ان محاورتي مع الطير اعجبتكم 0000 بس ياشباب 0000 من تعتقدون المفلوج انا ام الطيررررررر

لكم من كل الشكر لحسن المتابعة 0000 والجايات اكثر وتراها اول محاولة لي بالمحاورة