قصيدة: يالحون العود

السلام عليكم ورحمة الله وبركاته::

وشلونكم وعساكم طيبين أن شاء الله

أعجبتني القصيدة وقلت أنقلها لكم

الشاعر: سلطان الهاجري

القصيدة: يالحون العود

يالحون العود وإلا يامجارير الربـــــابـــه
اختلف معنى القصيد وضيّع الفنان فــــنه

حلم مدري علم مدري نوض برقٍ في سحابه
أثرها طلّة جبينه يوم زاح اللـــيل مـــــنّـــــه

أقبلت مثل الفرس لا سمعت طبول الحرابه
مقتفيها ليلٍ أسود والنـــــجـوم يفرّّقــــــنّه

النهار يمر ويعدّي وليله في عــــقـــــابه
النحر صبحٍ تجلّى والجدايل كنّهـــــنّــــه

مخملٍ يلتفّ فوق الجيد الأتلع بالنيـــــابــــه
عن سلاسيل الذهب والماس خوف يجرّحنّه

غاب عنّي والوله خلاّه عندي في غيــــابه
مادرى أن فرقاه نار ولا درى أن لاماه جنّه

يا وجودي وجد من صفّق على ماضي شبابه
بان شيبه والسنين اللي يبيهن خالــــــفــــــنّه

غرّته خضر السنين وراح عمره مادرى به
غرّرنّه وارفعنّه لـــــين سجّ وحــــولنّـــــــته

ويا وجودي وجد عودٍ لا عيال ولا قرابه
ماجداه إلا يونّ ويردف الـــــونّه بونّــــه

مالقى فزعة رفيق ولا دعاةٍ مستجابه
كلّ ماامساله بظنّ خيّبت الأيام ظنّـــه

هذا وجدي في غياب اللي نزح والله جابه
صح فرض الله فرض وسنّة الرسول سنّه

الغلا جسمٍ رقيق ومرهف إحساسي ثيابه
مثل غصن الورد يوم الهبايب يطـــــرقنّه

مازرعت إلا غلاه ولا نقلت إلا صــــوابــــه
والحشا ماضاق من خضر الطعون المستكنّه

ياحبيبي مازها كفّ الخضاب إلا خضابه
فيه نظم المفردات وفيه للعشّاق عنّـــه

الظبي ماله شبيه وبينك وبينه تشابـــــه
إلتفت بشويش وألقى فيه منك وفيك منّه

خالقك من فضّل محمد على كلّ الصحابه
وسخّرك مثل المهار اللي تسخّرها الأعنّه

والثنا والشكر للي رحمته تسبق عذابه
لا لخلق الله شكر ولا لخلق الله منّـــــه

قاله اللي ماخذا مما يريد إلا هبابـــــه
خيرة الفارس ثنيّة خيل صفراً مستعنّه

تحياتي لكم