الشاعر : معطاب بن مسيعيد الحفر الجميلي ~ يا ابو قحلول جيتك عقب مدة سنيني

الشاعر الكبير : معطاب بن مسيعيد الحفر الجميلي



يا ابو قحلول جيتك عقب مدة سنيني
عل يسقيك وداج الحيا كل عامي

من سحابٍ من المنشا طلع له رطيني
يلعج البرق فيها والرعد بانهشامي

لين جاك يتصفّق روضها والبطيني
من هماليل نوّ مبكّرات الوسامي

اذكرك يوم حنا باطرفك نازليني
خلبةٍ من عربنا من خوال وعمامي

بالحصانه و بام غوير مستانسيني
نرتوي من غديرك ما نشوف الزحامي

ماردٍ للقبايل من يسار ويميني
منك نشرب وتشرب كل هدفا سنامي

ذا يصدر وذولا عقبهم وارديني
والرعايا تعاقب عند شرب الضوامي

لكن اليوم جيتك لان ما فيك شيني
موقعك مندفن تمشي عليك الجهامي

ابو معجب تكلم عنك هرجٍ يقيني
فصّلك بالوصوف وكمّلك بالكلامي

من قرايض سعد لو قال بك كلمتيني
طبّت القلب ما تنساه دوم الدوامي

ولافي العيد يقصد بك من الاوليني
يا ابو قحلول من شافك يجيه الهيامي

كن ما داج بك ناسٍ من الطيبيني
من صناديد قوم ومن رجالٍ كرامي

ينطحون القبيل ويذبحون السميني
يعجبونك ليا وصلت لشد الحزامي

مع خيالٍ مليح ومع جمالٍ حسيني
دوجوا فوق جالك واقرشو ب انهزامي

زالهم وقتهم ما عاد هم راجعيني
الله اكبر جماعة قبل راحوا عدامي

بالمقابر وحنا عقبهم لاحقيني
سنة الله ب كل الخلق شرقٍ وشامي