الولد وان طاب طيبه من خواله(قصة القصيدة)

الشاعر راشد بن حسن الجمعه العجمي الملقب ( بالذيب )
كان يشتغل سوّاق في ارامكو وكانت انظمة ارامكو تمنع السائقين ان يشيلو الطرقيه اللي يوقفون السواقين ويطلبونهم توصيلهم على طريقهم ..
والشاعر راشد الله يرحمه كان يخالف التعليمات وكل هذا حيا فيه ومرجله
يوم من الايام أشرت له عجوز ومعها حمار (اعزكم الله)
قالت وصلني يا الأجودي قدام شوي
قال ابشيلك بس الحمار .لا
قالت له خلاص روح الله يستر عليك بيجي الذيب ويشيلني
(( تقصده لانها تسمع انه يشيل اي واحد يجي بطريقه وهي لاتعرفه))
قال لها يا خاله انا راشد الذيب
.. اركبي وابشري بالخير ..
وقيل انه توفي عام 1986م
وهو في نجران وكان شايل معه شخص موصله الى قرية في نجران
وحصل عليهم حادث رحمه الله
واليكم قصيدته المشهوره ردا على من انتقدوه
وكان السائد انذاك أن يأخذ صاحب السيارة على الشخص اذا كان بمفرده ريال واحد أما اذا كان معه حيوان فيأخذ عليه ثلاثة ريالات وكان يرفض اخذ مقابل فعل الخير

حالفٍ ماخذ على الطرقي رياله

وبالثلاث محرم أنه مايجيني

لالقيت اللي على الرستة لحاله

يلتفت ويقول وين المستحيني

أوقف الموتر حيا وأبي الجماله

يوم ولد اللاش وجهه ما يليني

الطمع في كروة الرجلي رزالة

خص وان جابه مجال الغانميني

والردي في حالة ماهي بحاله

واعوينه من كلام الطيبيني

الردي لو بان مايذكر عماله

مايعد اللاش مقصور اليميني

أركبه لعيون من زينٍ دلاله

ماتحاكوا في قفاه الرامسيني

مابغى غيري وانا مابغى بداله

قاعدٍ لي بالرجا مدة سنيني

الولد وان طاب طيبه من خواله

وان تردى من خواله خايبيني

الولد وان طاب قالو من خواله

بالخوال يسال قبل الوالديني

أشرب الفنجال واكب البيالة

تابعٍ سلمي سلوم الأوليني

ولاقعدنا بالعمل بنا الرزالة

ناخذ العليا طريق الفايزيني

قال خر الذيب من هاجوس باله

كلمة يلعب بها والبال زيني

قالها يومه طراله ماطراله

من هواجيسٍ تشيب المرضعيني

غرني بعض الرجال بكثر ماله

مادرى ان الموت في حبل الوتيني

كيف ينفعني وابا(..........) خاله

مايقوم البيت دام الساس طيني

ناس وين اللي عوايده الجمالة

مثل ابن ظافر حمد ليته يجيني

الثنا والجود دايم في خياله

علمه ظافر سلوم الطيبيني

جوّد العليا ولزمّها عياله

وادركوا من علمته دنيا وديني

واهني من باع حظه واشترى له

وسار في درب النبي وأخزى اللعيني

موقفه ماكل رجال يناله

من بغى ممشاه يقعد مرتيني

كم ذبح من حايل من حر ماله

وعادته لطمة خشوم العايليني



وللجميع تحياتي

</b>

صح لسان الشاعر ورحمه الله
تشكر على النقل ياخال

الله يعطيك العافية


احسنت الاختيار يالغالي

الولد وإن طاب طيبه من خواله


شطر مشهور

صح لسان شاعره وصحت أناملك

الله يرحمه ويجعل كل خير قام به في ميزان حسناته

صح لسان الشاعر وتسلم على النقل

صح لسان الشاعر ... وسلمت اناملك على النقل

الله يرحمه ويغفر له


وصح لسان الشاعر والناقل