قصيدة الشاعر الكبير / فهيد الباطح الجميلي رحمه الله
بصاحب السمو الملكي الأمير / سلمان بن عبدالعزيز آل سعود
مبداي بسم الله قبل كل ما ابديت .... الواحد المعبود رب العبادي
اللي يمشّيني ليا اصبحت وامسيت .... محصي النفوس اللي عليه اعتمادي
يبقيك يا شيخٍ لبيته تنصّيت .... ابو فهد سلمان ضد المعادي
يا حاكم الحكّام يا شايع الصيت .... يا عز شعبه والوطن والبلادي
بعبدالعزيز انت العوض ما تخفّيت .... والذيب ما علّم ولده المعادي
تشمل فضايلكم على الحي والميت .... وعاشوا بدارك حضرها والبوادي
ياما بذلت من الحساني وسوّيت .... وهايبٍ ما تنحصي بالعدادي
علم الثنا والجود فوقه تعلّيت .... يا موسم القاصر كريم الايادي
مالي بطول الشرح بك كل ما اطريت .. إن قلت وإن ما قلت مالك ملادي
ياما على شوفت وجودك تمنّيت .... ليا شفت من ضيم الليال النكادي
اربع سنينٍ بالكرى ما تهنّيت .... والعين عيّت عن لذيذ الرقادي
دينٍ على دينٍ من العشر ما اوفيت .... وألوج من همٍ علي متيادي
جاهدت في درب المعوشه وكلّيت .... وضيم الدهر طوّل علي الجهادي
والشوف قصّر والجهد منه ذلّيت .... وجرد الليالي قرّبن لبتعادي
يا سيدي تدري بلوجت هل البيت .... لصار حاديهم من القل حادي
حظّي كبيرٍ كان لي استلبّيت .... لك فزعتٍ تقض الغرض والمرادي
تكفا يا خو نورة تراني تقاصيت .... مالي معاش ولا حلالٍ يسادي
انك تدبّرني على ما تورّيت .... اسألك المولى على الرشد هادي
اشكيلك الحاله على مثل ما اوحيت .... وانت الذخيره بالرجا واستنادي
والله يا لولا فزعتك ما تعنّيت .... ياللي لصعبات المعاني مقادي