محاورة بين الشاعرين ~ الشاعر : حمود ابن حفر والشاعر : سعد ابن مساعد

محاورة بين الشاعرين :

الشاعر : حمود ابن حفر
و
الشاعر : سعد ابن مساعد


حمود ابن حفر

الحديقه رفرفرت لك يالحريجي من نسمها
معك ضابط فالعمل من طيبته تطرخ ردونه

ليت بقعا لوتلوفك ساعتن باخر قدمها
كان شفت النعمة اللي فالدوام تداومونه

سعد ابن مساعد

لاتحسد اللي ليا من جات فرصه يغتنمها
ولاتذم اللي جميع افراد زامه يمدحونه

كان ماتدري ترى اهل الطيب تعطي من كرمها
واجه الواقع لو المديون ماسدد ديونه

حمود ابن حفر

والله انا مانحسد الناس ونفتش ذممها
مثل ناسن لاغلبهم شخص منهم يشتمونه

نذبح الحايل وراعين الغنم تذبح غنمها
يالحريجي علمنا وشفيك تقصر حيل دونه

سعد ابن مساعد

لقمة الحساد تنشب يالسنافي وسط فمها
وانت ماحولك شكوك ولانت من ذيك النمونه

مانذمك والمنيحه من شحمها في لحمها
نعرف اللي وسط صدر الرجل من نظرة عيونه

حمود ابن حفر

الحريجي لوظلم نفسه ربوعه ماظلمها
خابرينه حصن للاصحاب واصحابه حصونه

المنيحه ماعرفنا وش لحمها من شحمها
تظهرون الطيب لون العكس عنا تدفنونه

سعد ابن مساعد

فتشو خد المطيه واعرفو منهو وسمها
وان عرفت الوسم قلي كيف حالك والمعونه

حط هذي عند هذي واخذ كلمه واستلمها
العقل ماهوب سلعة سوق حتى تشترونه

حمود ابن حفر

والله اني واسمن قسمي وغيري في قسمها
لاتظن بصاحبك لويظلمك لاتظلمونه

الظلايم يالحريجي جعل يخطيكم سهمها
والخبل عقيل ربعه لويجيهم مايجونه